Porchow (AK/SN). Wopłóčkowy zwjazk Při Klóšterskej wodźe (AZV) swoju centralnu wjesnu syć w Pančicach-Kukowje rozšěrja. Hromadźe z gmejnu chce nowe twarnišćo wotkryć. Na to so wčerawši z wjetšinu hłosow wobzamknjeny etat 2019 z hospodarskim planom AZV orientuje. Zwjazkowi radźićeljo gmejnow Porchow, Chrósćicy, Worklecy a Pančicy-Kukow hłosowachu za etat, Ralbičansko-Róžeńčanska gmejna jón wotpokaza. Za twarnišćo w Pančicach je do lětušeho hospodarskeho plana cyłkownje 83 000 eurow zapisanych. Kryta je suma ze 27 000 eurami přinoškow a ze 56 000 eurami kreditow. Klětuši předwidźi naćisk etata AZV cyłkownje 57 000 eurow za wotkrywanje twarnišća w Pančicach-Kukowje.
Budyšin. „Hrajkownja“ rěka nowy poskitk za swójby, kotryž organizuje swójbne kubłanje Rěčneho centruma WITAJ jutře, štwórtk, w foyeru a w bašće Serbskeho ludoweho ansambla. Tam móža swójby z dźěćimi wšelake towaršne a deskowe hry pospytać a sej při tym kofej, čaj a sad zesłodźeć dać. Wot 14.30 do 18 hodź. móža so swójby prosće na so koncentrować, zhromadnje hrać a bjesadować. Wosebje přeprošene su Witaj-swójby.
Wo nałožkach we wobchodźe
Wojerecy. Přichodne dopołdniše zetkanje seniorow Křesćansko-socialneho kubłanskeho skutka wotměje so jutře, štwórtk, w 10 hodź. we Wojerowskim Wjacsławkec drastowym domje na Złokomorowskej 19. Tam chcedźa wopytowarjam serbske zymske nałožki wot ptačeho kwasa hač k camprowanju zbližić. Zajimcy su wutrobnje witani.
Lawba so wotpaliła
Židźino. Póndźelu wječor Židźinscy wobydlerjo wobkedźbowachu, zo so na Sprjejčanskim puću zahrodowa lawba pali. Na to wołachu wohnjowu woboru, kotraž drje płomjenja zhaša, lawba pak so dospołnje zniči.
Zahrodowe stólcy kradnyli
Wojerecy. 77lětny Wojerowčan wčera zwěsći, zo běchu jemu njeznaći minjene dny ze zahrodoweje lawby na Šulskej stólcy pokradnyli. Policija pad přepytuje.
Mnozy znaja Clemensa Eckerta w Lipsku jako personalneho trenarja, dźěłaja z nim hromadźe na swojej fitnesy, zo bychu tež swoje sportowe cile realizowali. Wot spočatka februara pak je 33lětny młody Serb, kiž je w Smječkecach wotrostł, znajmjeńša po cyłej Němskej znaty. Wšako wobdźěli so w tydźenju wot 28. januara do 1. februara jako jedyn z pjeć kandidatow na warjenskim wubědźowanju „Perfektny diner“, kotrež je sej wšědnje tež wjele Serbow w priwatnym telewizijnym sćelaku VOX wobladało. Zhromadnje z Lipšćanku Sophie je Eckert wubědźowanje dobył, a dźěli sej z njej nětko premiju 3 000 eurow.
Wosrjedź Branibora nad Habolu (Brandenburg an der Havel) zaměstnjeny je muzej „Słowjanska wjes“ pod hołym njebjom. Podobnje kaž w Dešnje běchu tam historiske sydlišćo po srjedźowěkowskim přikładźe natwarili a prawidłownje tematiske zarjadowanja přewjedli, wobswětlace žiwjenje při Haboli sydlaceho kmjena Połobskich Słowjanow. Nimo wotmysła, hosći přiwabić, ma rekonstruowana wjes na korjenje města kaž tež jeho prěnjotnych wobydlerjow dopominać. Wobhospodarjer muzeja je komunalne towarstwo z wobmjezowanym rukowanjom za spěchowanje dźěła a strukturne rozwiwanje Branibor nad Habolu (BAS). Oficialna měšćanska turistiska brošurka mjenuje „Słowjansku wjes“ mjez turistiskimi wjerškami runje tak kaž internetna strona komuny. Přichod muzeja pak je njewěsty. Byrnjež dochody mzdy sobudźěłaćerjow zaručili, pjenjezy powšitkownje pobrachuja, wosebje nastupajo nuznje trěbne wobnowjenja. Tuchwilu je drje 5 000 eurow za saněrowanje k dispoziciji, štož pak za zdźerženje wsy zdawna njedosaha.
Hólcy 7. lětnika Serbskeho gymnazija Budyšin (SGB) dobychu w Kamjencu wolejbulowe regionalne finale šulerskeho wubědźowanja „Młodźina trenuje za olympiju“. Hrajerjo wokoło kapitana Eliasa Kummera přewinychu gymnaziastow z Radeberga a Ochranowa kaž tež šulerjow WŠ Rychbacha stajnje z 2:0, a pojědu 3. apryla na sakske krajne wurisanje do Grimmy.
W stawiznach wolejbuloweho sporta na SGB kwalifikowachu so druhi raz hólcy najmłódšeje starobneje skupiny za sakske finale. Před sydom lětami běchu to hrajerjo wokoło kapitana Mateja Cyža, kotřiž so z bronzowej medalju nawróćichu. Z rjanym wuspěchom aktualnych wolejbulistow w regionalnym finalu w Kamjencu powjetši so ličba docpětych finalow na třinaće. Jedna slěborna a pjeć bronzowych medaljow je zwjeselaca bilanca našich šulerjow w dotalnych kónčnych krajnych wurisanjach při wysokim saku.
Serbski gymnazij Budyšin – Wyša šula Rychbach 2:0