Prawa na mjenje Zhorjelsko-Žitawskeho jewišća su nadal na předań

Zhorjelc (dpa/SN). Gerharta Hauptmannowe dźiwadło Zhorjelc-Žitawa (GHT) je spočatk aktualneje hrajneje doby poskićiło, prawa na swojim mjenje předać (Serbske Nowiny rozprawjachu). Akcija je po cyłej Němskej kedźbnosć zbudźiła.

Hladajo na „permanentnu pjenježnu nuzu w zjawnych kasach“ njeje intendant institucije Daniel Morgenroth akciju zakónčił, byrnjež – drje wuwědomiwši sej wysokosć płaćizny – konkretne namjety njedóšłe. Dotalne naprašowanja běchu „daloko wot toho zdalene“, štož su sej iniciatorojo předstajili: „Šěsćcyfrowa suma měješe to być. Pjenjez je na kóždy pad dosć. Zdadźa so jenož wopak rozdźělene być“, měni Morgenroth.

Zamóženje najbohatšich ludźi je so w minjenych lětdźesatkach rozmnožiło. Wulke internetowe a inwesticiske firmy su rekordne dobytki zličili. „Sćěhujemy z našej akciju prosće ekonomiskej logice“, intendant wuzběhny. Wšako su „kulturne zawody přeco zaso ze žadanjom konfrontowane, wjace srědkow třećich nawabić“.