Předčitanska funkcija hoberski wuspěch – digitalizacija nadal ćežišćo

Budyšin (SN/bn). „Cyle tak małka institucija hižo njejsmy“, zjimaše direktor Serbskeho instituta prof. dr. Hauke Bartels aktualny staw slědźenišća we wobłuku wčerawšeje nowinarskeje rozmołwy w Budyšinje, pokazawši na „tuchwilu stajnje něhdźe 70 sobudźěłaćerjow – telko kaž nihdy do toho. SI je dźensa dwójce tak wulki kaž před dźesać lětami a z tójšto hóstnymi slědźerjemi kaž tež sydom do dźesać doktorandami dosć atraktiwne akademiske stejnišćo“. Wědomostny spektrum domu bu po jeho słowach rozšěrjeny a wopřijima nimo rěčespyta a stawiznow na přikład hudźbne, dźiwadłowe a kulturne wědomosće kaž tež archeologiju. Hladajo na lěto 2024 bě Bartelsej njedawne wotewrjenje kulturnohistoriskeje wučbneje šćežki wo wukubłanju Serbow w powójnskim času we Varnsdorfje z přikładom za „wotzamknjeny projekt, kotremuž pohłubšace slědźenja slěduja“.