Wuznamneho serbskeho žurnalista a politiskeho aktiwista počesćili

Njebjelčicy (SN/bn). Składnostnje 80. posmjertnin Jana Skale stej spěchowanske towarstwo Smy z.t., kotrež podpěruje wutworjenje prěnjeho demokratisce legitimowaneho ludoweho zastupnistwa Serbow – Serbski sejm, a Domowinska skupina Njebjelčicy předwčerawšim wuznamneho serbskeho žurnalista, publicista a politiskeho aktiwista wopominali. Při pomniku za prócowarja před po nim pomjenowanej pěstowarnju w Njebjelčicach połožichu wěnc. Z tym počesćichu we wsy narodźeneho Skalu, kiž je po słowach bywšeho wjesnjanosty gmejny Tomaša Čornaka „generacije Njebjelčankow a Njebjelčanow wobwliwował a so hižo před sto lětami za samopostajowanje Serbow a za serbski parlament zasadźował. Nětko so jeho wizije poněčim spjelnja.“ Na literariske skutkowanje počesćeneho dopomniwši recitowaštej Hańža Deleńkowa basni Skale „Młodemu přećelej“ a „Dźěći“ kaž tež Tomasz Nawka Skali wěnowane wjerše „Sy mjez nami ty“ z pjera Antona Nawki.