Němska a Francoska přewostajitej Ukrainje dalšu wojersku pomoc

Berlin (dpa/SN). Ukrainski prezident ­Wolodymyr Zelenskyj je so po swojim krótkim wopyće w Němskej a Francoskej zaso do Kijewa nawróćił, a móže so dalšeje wojerskeje pomocy wobeju krajow nadźijeć. W Berlinje a Parisu bě sej Zelenskyj wčera wospjet wojerske lětadła ­žadał. Zwjazkowy kancler Olaf Scholz (SPD) kaž tež francoski statny prezident Emmanuel Macron reagowaštaj pak zdźeržliwje. Francoski statny šef chcyše so, kaž z Élyséejowejo palasta rěkaše, dźensa wječor w telewizijnej rozmołwje k dalšej wojerskej pomocy wuprajić.