Němska a Ruska za Syrisku
Policija podhladneho zajała
Biskopicy (dpa/SN). W zwisku z wutřělemi na nimojěduce awta je policija wčera w lěsu njedaloko Biskopic 42lětneho muža zajała. Wón bě wjetše hałzy na statnu dróhu S 111 mjetał. Runje tam bu wospjet na awta třělane. Hač je zajaty muž zdobom třělc, chcedźa nětko zwěsćić, policija zdźěla. Muž je tuchwilu w jatbje, hdźež jeho přesłyšuja. Wón bydli w Biskopičanskej končinje. Jako jeho zastojnicy zajachu, njeměješe bróń při sebi. Wón měješe 0,6 promilow alkohola w kreji a skutkowaše zamyleny.
Cyłkownje pjeć šoferow bě so minjene dny na policiju wobroćiło, po tym zo bu na jich jězdźidło třělane. Zdobom je hišće dalšich dźesać padow, kotrež so do mustra hodźa, kaž policija informuje. W jednym padźe móžachu zastojnicy projektil třělby zawěsćić. Wo kotru družinu so jedna, njeje cyle jasne.
Minjenu póndźelu bě 38lětna šoferka po Biskopicach jěducy wutřěl słyšała a po tym škodu na durjach swojeho awta zwěsćiła. Dźeń pozdźišo bu jězdźidło 55lětneho muža wobškodźene.
To a tamne (20.08.18)
Zo móhł tola hišće z lětadłom sobu lećeć, je zapozdźeny pasažěr ze swojim handyjom wosom mjeńšin do wotlěta lětanišćo w Londonje zawołał a tam z bombu hrozył. Tak chcyše mašinu do Los Angelesa hišće docpěć. Špak wšak bě tón, zo zawoła z handyjom, z kotrymž bě lět knihował. Jako chcyše 47lětny Francoz jědnaće dnjow pozdźišo wot samsneho lětanišća do USA lećeć, policija jeho zaja. Londonske sudnistwo je nětko konsekwency telefonata postajiło. Dźesać měsacow smě muž do jastwa.
Schody do domu prosće wottwarił je podružnik w Mnichowje. Do toho bě přenajer wjaceswójbny dom při nuzowej awkciji kupił a njemóžeše nětko do swojeho bydlenja. Na sudnistwje podružnik twjerdźeše, zo je sam schody wobstarał, čehoždla jemu słušeja. Sudnicy pak rozsudźichu, zo słuša nowemu wobsedźerjej cyły dom, tak tež schody.
Angela Merkel: „Kritika ma tež swoje dobroty“
Wjazońca (dpa/SN/JaW). Zwjazkowa kanclerka Angela Merkel wopyta wčera předewzaće Trumpf we Wjazońcy. Zhromadnje ze sakskim ministerskim prezidentom Michaelom Kretschmerom (wobaj CDU) je so wona na městnje wo dźěle přistajenych wobhoniła. Na něhdźe hodźinskim wopyće wotmołwješe zdobom na prašenja něhdźe 250 dźěłaćerjow. Woni prašachu so za wolóženjom dawkow, nawabjenjom fachowcow kaž tež za přičinu, čehodla so mnozy ludźo w Sakskej chětro zludani wotwobroćeja a politiku strony kritizuja. „Kritika ma tež swoje dobroty, dokelž nas runje tak znjeměrnja“, kanclerka zwurazni. Za wažne pak Angela Merkel zdobom ma, kritiku konstruktiwnje wužiwać a prawu měru namakać. Wot Michaela Kretschmera chcychu přitomni mjez druhim wědźeć, čehodla sakske knježerstwo njeje prjedy přećiwo njedostatkej wučerjow postupowało. Sakski premier přizna zmylki, skedźbni pak na kubłanski paket. Skónčnje buštaj wobaj politikarjej z aplawsom rozžohnowanaj. „Je derje, zo kanclerka tež raz na wjes přijědźe a jenož města njewopytuje“, rjekny dźěłaćer Antonio Meinert powěsćerni dpa.
Putin znowa w Němskej
Berlin (dpa/SN). Do jutřišeho wopyta ruskeho prezidenta Wladimira Putina pola zwjazkoweje kanclerki Angele Merkel (CDU) žada sej strona FDP změnu politiki napřećo Moskwje. „Ruska ma so zaso do kruha statow G8 wróćić“, wuzběhny předsyda FDP Christian Lindner dźensa w nowinje Passauer Neue Presse. Jeli Krjeml swoju politiku změni, móhła so Ruska zaso z politiskim partnerom stać. „Tuchwilu spyta Putin Europu pačić, štož njemóžemy dowolić.“ Hižo druhi raz w běhu třoch měsacow přijědźe ruski prezident na rozmołwy do Němskeje.
USA Turkowskej znowa hroža
Washington/Istanbul (dpa/SN). USA su Turkowskej z dalšimi sankcijemi hrozyli, jeli pod domjacym arestom stejaceho fararja Andrewa Brunsona njepušći. Knježerstwo je sankcije hižo přihotowało, rjekny ameriski financny minister Steven Mnuchin wčera na posedźenju kabineta we Washingtonskim Běłym domje. Kriza wuskutkuje w Turkowskej wulke turbulency měny lira. Prezident Recep Tayyip Erdoğan nadźija so nětko inwestorow z wukraja.
Bombu znješkódnili
Wosebite zwučowanje w nuzowym padźe su wohnjowi wobornicy srjedu ...
Strašne wuprajenje
VW produkcijuawtow rozšěri
Sakska chce přichodnje wjac pjenjez wudać
Drježdźany (dpa/SN). W času wjetšich dawkowych dochodow chce Sakska dale zlutniwje hospodarić a dołh pomjeńšić. To připowědźi wčera sakski financny minister Matthias Haß (CDU), rozłožowacy w Sakskim krajnym sejmje naćisk dwójneho etata za lěće 2019 a 2020. „Najwyša priorita wostanje, našim wnučkam a naslědnym generacijam žadyn hoberski dołh njezawostajić“, wón rjekny. Přiwšěm chce financne ministerstwo swobodneho stata telko pjenjez wudać kaž hišće ženje. Za lěto 2019 su wudawki 20,1 miliardy eurow předwidźane. Lětsa je to 18,9 miliardow eurow. W decembru ma krajny sejm etat wobzamknyć.
Ličba přistajenych kraja so wot 89 000 na 90 000 powjetši. Před něšto lětami hišće bě zaměr 70 000 sobudźěłaćerjow. Matthias Haß zapósłancow překwapi, prajo, zo njebu wot lěta 2009 ani jeničke dźěłowe městno w sakskim zarjadnistwje šmórnjene. Pod jeho předchadnikom Georgom Unlandom njejsu so wšitke dźěłowe městna w oficialnym planje scyła jewili. Financny minister přilubi tuž wjace transparency.
Wjelki w přirodźe njepicować
Kontakt z ludźimi wjedźe k njewšědnemu zadźerženju rubježneho zwěrjeća
Waršawa/Rěčicy (SN/BŠe). Wjelka bojeć so nichtó njetrjeba. Tak wopodstatnjeja to fachowcy, kotřiž so hižo lěta z rubježnym zwěrjećom zaběraja. Pad na juhowuchodźe Pólskeje pak pokazuje, zo strach přiwšěm wobsteji. Kónc junija bě wjelk tam dwě dźěsći w starobje wosom a dźesać lět nadpadnył a kusnył. Na zbožo njedóńdźe k žanym ćežkim zranjenjam. Šokowace dožiwjenje pak to za potrjechenych na kóždy pad wostanje.
