Havanna (dpa/SN). Parlament na Kubje je nowu wustawu schwalił, kotraž zmóžnja mjez druhim jenakosplažne mandźelstwa, priwatne wobsydstwo a wukrajne inwesticije w kraju. We wčera wobzamknjenym naćisku so zapřijeće „komunizm“ hižo njejewi. Přiwšěm wostanje komunistiska strona jenička legalna strona socialistiskeho karibiskeho stata. Wobydlerjo Kuby změja w nowembru składnosć, wo prěnjej nowej wustawje po lěće 1976 wothłosować.

Trump a Ruhani sej hrozytaj

Washington (dpa/SN). Prezident USA Donald Trump a jeho iranski kolega Hassan Ruhani staj sej z chětro raznymi słowami mjezsobu nadawałoj a před nowymi hroženjemi warnowałoj. „Njewohrožujće ženje wjace USA, hewak dožiwiće konsekwency, kotrež njejsće w swojich stawiznach hišće ćerpjeć trjebali“, Trump minjenju nóc twitterowaše. Wón reagowaše na Ruhanija, kotryž bě Trumpej w zwisku z hospodarskimi sankcijemi wumjetował, zo sej z wohenjom hrajka. Nimo toho Ruhani hrožeše, Persiski zaliw za wšitke wolijowe łódźe blokować.

Němscy wobornicy pomhaja

Wjace hač 20 000 ludźi je wčera w Mnichowje přećiwo prawicarskim tendencam w towaršnosći demonstrowało. Pod hesłom „Wušćuwani – zhromadnje přećiwo politice stracha“ šwikachu wobdźělnicy politiku knježaceje CSU ćěkancam napřećo kaž tež nowy policajski zakoń w Bayerskej. Předsydźe CSU Horstej Seehoferej, ministerskemu prezidentej Markusej Söderej a šefej krajneje skupiny CSU Alexanderej Dobrindtej wumjetowachu paćenje towaršnosće. Foto: dpa/Andreas Gebert

Berlin (dpa/SN). Zwjazkowa ministerka za justicu Katarina Barley ma wumjetowanja wotstupjeneho hrajerja němskeje narodneje koparskeje wubranki Mesuta Özila rasizma dla za signal hłuboko sahaceho towaršnostneho problema. „Je alarmowace znamjo, hdyž nječuje so němski kopar kaž Mesut Özil w swojim kraju rasizma dla akceptowany a wot koparskeho zwjazka hižo reprezentowany“, politikarka SPD wčera wječor twitterowaše.

Z dotal njesłyšanymi wumjetowanjemi rasizma dla přećiwo šefej koparskeho zwjazka DFB Reinhardej Grindelej a druhim funkcionaram DFB bě Özil wčera němske narodne koparske mustwo wopušćił. We wjacdźělnym stejišću w Gelsenkirchenje rodźeny kopar z turkowskimi korjenjemi pisaše: „We wočach Grindela a jeho pomocnikow sym Němc, hdyž dobudźemy, ale imigrant, hdyž přěhrajemy.“ Özil sej žada: „Ludźo z rasistiskim diskriminowacym pozadkom njesměli dlěje w najwjetšim koparskim zwjazku swěta dźěłać směć, kotryž ma telko hrajerjow ze swójbow wšelakeho pochada. Njejsym dlěje winik jeho njekompetentnosće a njekmanosće“, Özil hladajo na Grindela piše.

Waršawa (dpa/SN). Pólski justicny minister Zbigniew Ziobro je přeprošenje pensionowaneje prezidentki najwyšeho pólskeho sudnistwa Małgorzaty Gersdorf do Němskeje kritizował. „To su špatne pospyty, předewšěm ze stron němskich juristow, nam diktować, kak mamy swoje pólske prawo interpretować a kak mamy swoju justicu natwarić“, rjekny 47lětny kónc tydźenja sćelakej TVP Info. Nawodźa Zwjazkoweho wustawoweho sudnistwa a Zwjazkoweho sudnistwa běchu so minjeny pjatk na zhromadnym wustupje w Karlsruhe z Gersdorf, kotruž bě pólske knježerstwo z nowym zakonjom na wuměnk pósłało, solidarizowali. Pólska so z knježerstwom strony Prawo a sprawnosć stajnje dale wot prawnostatnosće zdaluje, w stejišću wobdźělnikow rěka. Waršawa bě zakoń schwaliła, z kotrymž dyrbja sudnicy hižo z 65 lětami do renty hić a nic kaž dotal ze 70. Kritikarjo widźa w tym pospyt, njelubych sudnikow wotbyć. Ziobro mjenowaše wumjetowanja ze stron Němskeje „směšne“ a justicnu reformu znowa zakitowaše.