Wo zrěčenju hišće njerozsudźili
Zasakła ćahańca referenduma dla
Barcelona/Madrid (ČŽ/K/SN). Wothłosowanje katalanskeje ludnosće 1. oktobra, hač chce njewotwisnosć Katalonskeje wot Madrida, ma so tak abo znak přewjesć. Za naprawu, wot awtonomneho parlamenta schwalenu, zasadźeja so wšitke wo wotwisnosć prócowace so strony a mocy z premierom Carlesom Puigdemontom na čole, byrnjež zasudźacych reakcijow ze stolicy přibywało. Tola tež opozicija referendum wotpokazuje, mějo jón njeznjesliwy z wustawu. W Barcelonje su znowa tysacy za přewjedźenje ludoweho rozsuda demonstrowali, při tym wótře zwuraznjejo „njebojimy so“.
„Za“ město „přećiwo“!
To a tamne (21.09.17)
Z papjerjanej, přez hłowu sćehnjenej titu je 45lětny w Bardowicku pola Lüneburga nakupować šoł. Nochcyše spóznaty być, dokelž měješe zastup do wobchoda zakazany. Přiwšěm njeje so muž tež tónkroć zadźeržał. Wón dźěše runu smuhu k polcy spirituozow, hdźež hnydom wino z kartonka piješe. Personalej je maskěrowany lačny muž wězo napadnył. A tuž ma nětko jednanje na šiji: kaženja domjaceho měra a padustwa dla.
Tobołku ze 14 000 eurami w podzemskej železnicy zabyła je 78lětna žona, kotrejž napadny to hakle mjeńšiny pozdźišo, po tym zo bě hižo wulězła. Pjenjezy pak běchu po dołhim pytanju sobudźěłaćerjow wobchadneho předewzaća fuk. Hač bě bankowki něchtó pokradnył, njemóžachu tam rjec. Dóstała je je staruška potom tola zaso. 16lětna ćěkanča z Iraka bě tošku z pjenjezami namakała, a jeje mać dowjeze je na policiju.
40 milionow ludźi njewólnicy
Genf (dpa/SN). Něhdźe 40 milionow ludźi po cyłym swěće je po informacijach Zjednoćenych narodow wopor moderneho njewólnistwa. Nimo toho tež 152 milionow holcow a hólcow w starobje pjeć do 17 lět dźěła. Tole wuchadźa z rozprawow Mjezynarodneje dźěłoweje organizacije (ILO) a Mjezynarodneje organizacije za migraciju ze sydłom w Genfje. „Nowe trochowanja móža pomhać, wuwić naprawy přećiwo nućenskemu a dźěćacemu dźěłu“, zdźěli direktor ILO Guy Ryder.
Na fuziju so dojednałoj
Essen (dpa/SN). Po wjace hač lěto trajacych jednanjach je so Essenski industrijny koncern Thyssenkrupp z indiskim konkurentom Tata na fuziju z europskej spartu dojednał. Doskónčne zrěčenje chcedźa spočatk lěta 2018 podpisać, wozjewi Thyssenkrupp dźensa w Essenje. Wobě předewzaći chcetej 2 000 dźěłowych městnow wotstronić, štož ma zhromadny wužitk 400 do 600 milinow eurow wunjesć. Nowa towaršnosć změje swoje sydło w Nižozemskej.
„Kriminelni“ swět wohrožeja
Znowa je w Mexiku zemja ržała. Po informacijach seismologiskeho ...
Ćeže, ćěkancow integrować, dale wobsteja
Budyšin (SN/BŠe). Tuchwilu bydli w Budyšinje 81 ćěkancow w bydlenjach, jědnaće w Sprjewinym hotelu a 238 w Greenparku. Zo by so integracija ćěkancow poradźiła, na tym dźěła wosebita syć w Budyšinje, kotraž so we wěstych wotstawkach zetkawa. Před třomi lětami, jako sprjewine město prěnich ćěkancow přiwza, běchu so akterojo – sakska policija, chorobne kasy, dźěłowa agentura, nawodźa pěstowarnjow, šulow, a hortow, zastupjerjo cyrkwjow a Budyskich zarjadow kaž tež čestnohamtscy pomocnicy – prěni raz zešli.
Póndźelu wotměchu mjeztym 26. dźěłowu rozmołwu. A kaž so wujewi, wobsteja dale ćeže ćěkancow integrować. Zastupjerce pěstowarnje w Budyskej Strowotnej studni rozprawještej, zo maja ćeže, tołmačerja nańć, kiž měł na přikład wuwićowe rozmołwy mjez staršimi a kubłarku přełožić. Rěčny problem so we wšelakich žiwjenskich wobłukach stajnje zaso pokazuje. W šulach njemóža dźěći ćěkancow wučbu sćěhować, dokelž njeznaja fachowe wurazy, na přikład w biologiji. Šulscy nawodźa tuž namjetuja pruwowanja za ćěkancow w někajkej formje změnić.
Ministerstwo pósłanca zaso skazało
Berlin (dpa/SN). W běhu jenož 48 hodźin dyrbješe němski pósłanc w Ankarje Martin Erdmann dwójce do turkowskeho wonkowneho ministerstwa přińć. Na póndźelnej rozmołwje dźěše wo lěta trajacu rozkoru zastopnjowanja ludomordarstwa w zwisku z morjenjom a deportacijemi Armenjanow přez Osmaniske mócnarstwo. Turkowska masakry wotpokazuje. Wot junija je tuž poćah mjez krajomaj špatny. Nětko kritizowaše turkowske knježerstwo dźěłarničku njewotwisneje załožby, kotraž je historisku temu w zwisku z pedagogiskimi konceptami wobjednawała. Němski pósłanc pak skedźbni na njewotwisnosć a swobodu załožbow w Němskej.
To bě bětko hižo 17. króć, zo dyrbješe so pósłanc Martin Erdmann w běhu dweju lět w turkowskim ministerstwje wusprawnić. Hakle sobotu su jeho kulturneho swjedźenja Kurdow w Kölnje dla do ministerstwa skazali. To słuša ke chutnym instrumentam diplomatiskeho protesta. Mjez partnerami NATO tajke skazanje pósłancow z wašnjom njeje.
Manewer zaměr njepřekročił
Strachi, twjerdźenja a připowědźe njewoprawnjene byli
Moskwa (ČŽ/K/SN). Tydźeń trajacy rusko-běłoruski manewer Zapad 2017 je tak derje kaž nimo, a hranicy na Baltikumje a druhdźe na wuchodźe su dale tajke kaž do 13. septembra. W žanych medijach njeje ani noticki wo tym, zo bychu ruscy wojacy z běłoruskimi hromadźe něhdźe teritorij NATO nadpadnyli a zo bychu jich tanki tam něšto rozbili.
Smě so tuž za to měć, zo wotmě so manewer Zapad 2017 w zaměrowym wobłuku, za kotryž bě wot ruskeho zakitowanskeho ministerstwa připowědźeny. Dźěše wo strategiski trening zakitowanja a wotwobaranja terora. We wuchodnych kónčinach Ruskeje a Běłoruskeje je 12 200 wojakow (5 000 ruskich a 7 200 běłoruskich), 70 lětadłow a helikopterow, 250 tankow, dwěsćě kanonow a dźesać wójnskich łódźi operowało.
Tilich ma so nětko wo porjad starać
Nastupajo wuslědk wurjadneho posedźenja Budyskeho wokrjesneho sejmika reagujetej opoziciskej stronje Lěwica a Zwjazk 90/Zeleni z porokom ministerskemu prezidentej Stanisławej Tilichej (CDU).
