Rozmysluju wo tym, hač swoju próstwu za listowe wólby Němskeho zwjazkoweho sejma cyle jednorje serbsce wupjelnju. Bych chcyła, zo moje zapiski akceptuja. Wšako je serbšćina w Sakskej hamtska rěč a wólbne informacije njerozsyła Zwjazk, tež hdyž wobsteji cyłoněmski přizjewjenski register. Komuny maja nadawk informować, wólby přihotować a přewjesć. Na wotpowědnych zarjadach dźěłaja samsni ludźo, kotřiž staraja so druhe lěta wo podłožki za wólby krajneho sejma. Prawniske předpisy za wólby zwjazkoweho sejma pak předwidźa nažel jenož němsku jednorěčnosć. Njejsym sej tuž wěsta, hač bychu moje w serbskej rěči podate informacije připóznali abo za njepłaćiwe měli. Zwjazk spěchuje Serbow, a smy připóznata awtochthona mjeńšina. Čehodla tuž njeměli w serbskej rěči a druhe mjeńšiny w swojej maćeršćinje dokumenty wupjelnić? Derje, zo so Rada za serbske naležnosće z temu zaběra! Milenka Rječcyna

Drježdźany (SN/BŠe). Awtomobilowa branša je wodźacy industrijny wobłuk Němskeje a Sakskeje. Dźensa dźěła w nim wjac hač 80 000 ludźi swobod­neho stata. Aktualneho połoženja wotpłunoweho skandala dla bě awtomobilowa branša tež tema posedźenja Sakskeho krajneho sejma.

Hospodarski minister Martin Dulig (SPD) apelowaše na industriju, nastupajo technologiske inowacije njepopušćić a sej dowěru kupcow zdobyć. Producenća jězdźidłow maja zamołwitosć napřećo kupcej. „Dyrbimy dieselowu technolo­giju dale wuwić“, wón wuzběhny. Awtomobilowa industrija ma so wo to starać, zo přetwar dieselowych jězdźidłow funguje, a za to zamołwići su awtotwarcy. „Wo zakazu dieselowych motorow ničo njedźeržu“, hospodarski minister podšmórny. Tuchwilnu debatu ma wón za šansu, branšu wobnowić. Wustork jědojteho wotpłuna ma so dale a bóle pomjeńšeć. Hospodarske ministerstwo je zwólniwe twarcow a dodawaćelow jězdźidłow podpěrać.

Bozen (SN). Južnotirolska ludowa strona (SVP), kotraž je sobustaw Federalistiskeje unije europskich narodnych mjeńšin (FUEN), a iniciatorojo wobydlerskeje iniciatiwy awtochtonych mjeńšin, su nětko zhromadnje regionalnu kampanju za wobydlersku iniciatiwu Minority SafePack zahajili. „Podpěramy iniciatiwu, kotraž­ wusměrja so na Europsku uniju“, zwuraznichu politikar SVP Philipp Achammer, najwyši zarjadnik Južneho Tirola Arno Kompatscher, zapósłanc italskeho parlamenta, ladinski politikar a wiceprezident FUEN Daniel Alfreider, zapósłanc Europskeje unije Herbert Dorfmann, wiceprezidentka FUEN Mar­tha Stocker a bywši najwyši zarjadnik Južneho Tirola Luis Durnwalder tele dny na nowinarskej konferency.

Eksploziwnu namakanku z Druheje swětoweje wójny je niski pegel Łobja wujewił. We wokrjesu Mišno su wuchodźowarjo wojerske warjenske sudobjo w błóće rěki wuhladali. W nim pak běchu wjacore­ patrony třělbow a pistolow. Wuchodźowarjo wotedachu eksploziwny po­kład policiji, a ta přewostaji ju fachowcam, kotřiž su municiju znješkódnili.

Parna walca je so wo poslednje přeće lěta 2015 zemrěteho spisowaćela Terryja Pratchetta postarała. Na smjertnym łožu bě sej wón přał, zo jeho dźesać njedopisanych romanow zniča. Kaž zarjadnik zawostajenstwa­ Rob Wilkins zdźěli, je historiska­ parna walca přeće spjelniła a wotpohladnje přez Pratchettowy kompjuter jěła. Jeho romany njehodźa so tuž hižo wozjewić a wostanu na přeco zhubjene. Zbytki kompjutera přińdu nětko do wustajeńcy Salisburskeho muzeja.