Drježdźany (dpa/SN). Bywši direktor Sakskeje krajneje centrale za politiske kubłanje Frank Richter je z CDU wustupił. Bě to „wosobinski rozsud swědomja“, z kotrymž bě so wón hižo dlěši čas nosył, rjekny znaty wojowar za čłowjeske prawa nowinarjam Sächsische Zeitung. „Mój wustup je znamjo jasnosće, nic hněwa.“ Richter wopodstatni swój rozsud z po jeho měnjenju pobrachowacej kulturu wadźenja a diskusije w sakskej uniji. „Demokratija je wjace hač jenož puć k wólbnemu kašćikej. Wona rozeznawa so wot monarchije mjez druhim w tym, zo maja ju wobydlerjo za swoju naležnosć, a nic za naležnosć krala, a zo wo jeje přichodźe zjawnje a kontrowersnje diskutuja.“ Richter, kiž bě spočatk 1990tych do CDU zastupił, nawjedowaše centralu wot lěta 2009 hač do spočatka 2017. W tejle funkciji měješe tež wospjet rozmołwy ze zastupnikami Domowiny. Nimo toho wobdźělowaše so wospjet na kóždolětnym Budyskim forumje, w kotrymž režim potłóčowanja w něhdyšej NDR z pomocu časowych swědkow předźěłuja.

Pod wliwom drogow stejaceho lokomotiwnika je policija w Hamburgu lepiła. 40lětny je po dotalnych dopóznaćach ćah z 40 wagonami a 3 800 tonami ranžěrował. Při tym ignorowaše signal a zajědźe bjezmała do barjery. Swědk bě do toho wobkedźbował, kak lokomotiwnik joint kuri. Drogowy test na THC, wobstatk hašiša, bě pozitiwny, policija zdźěli. Jězbnu dowolnosć lokomotiwnika dyrbješe 40lětny wotedać.

Jako powědarjo bajkow móža so sakscy politikarjo wopokazać. Při 4. bajkowym festiwalu swobodneho stata wot 17. do 27. awgusta chcetaj so tež sakski ministerski prezident Stanisław Tilich a prezident krajneho sejma Matthias Rößler (wobaj CDU) wobdźělić, Němski centrum bajkoweje kultury jako zarjadowar informuje. Festiwal wěnuje so lětsa pomjeznej kónčinje k Čěskej a tež serbskim tradicijam.

Budyšin (SN). Njeznaći su w nócy na wutoru běrow zapósłanče w zwjazkowym sejmje a městopředsydki frakcije Lěwicy Caren Lay w Budyšinje nadpadyli. „To je jědnata ataka w Budyšinje a cyłkownje 27. nadpad na jedyn z mojeju wólbnowokrjesneju běrowow wot lěta 2010“, zdźěli zapósłanča.

Skućićeljo běchu spytali, z kamjenom wokno zachodnych duri přerazyć. Njeskutk je policiji přizjewjeny, próstwa wo chłostanje zapodata. Lay namołwi policiju njeskutk přepytować a wujasnić. Při tym je zapósłanče wažne zhonić, „dalokož tu zwisk k aktualnje přiwótřenej klimje w Budyšinje a zjawnje zwuraznjenej kritice na mojej wosobje a stronje po mojich słowach k najnowšim rozestajenjam na Žitnych wikach wobsteji“.

Runje na zahajacej so horcej fazy wólbneho boja nima Caren Lay namóc jako srědk rozestajenja za akceptabelnu.

Kaž Zhorjelska policiska direkcija na naprašowanje SN zdźěli, je Operatiwny wotwobaranski centrum (OAZ) sakskeje policije w Lipsku přepytowanja zahajił.

W Serbach njeje wón žadyn njeznaty, wšako ze swojimi 2,12 metrami hižo optisce wšitko přesahuje. Roman Dźisławk z Chasowa pak je přiwšěm tež politisce a towaršnostnje angažowany čłowjek.

Lěta 1975 rodźeny z Haslowa pochadźacy Roman Dźisławk bě po maturje na Budyskim Serbskim gymnaziju w Drježdźanach zawodne hospodarstwo studował. Dźensa nawjeduje logistiski wotrjad Hornjołužiskich klinikow w Budyšinje z 50 sobudźěłaćerjemi a ma tak dosć wulku zamołwitosć. Lěta 2004 bě Roman Dźisławk nachwilnje za Serbske Nowiny dźěłał a za naš wječornik nowy moderny redakciski system wobstarał.