To a tamne (03.07.17)
Z policajskim awtom na wěrowanje přijěła je njewjesta w Durinskej. Do toho bě šoferka taksija z dwěmaj hosćomaj do kwasneho awta zrazyła. Po protokolowanju njezboža wosta njewjesće runje hišće štwórć hodźiny, zo by na 15 kilometrow zdaleny hród Scharfenstein dojěła. Zastojnicy dołho njewahachu a dowjezechu ju hromadźe z maćerju na hród. „Po poslednich informacijach bě wěrowanje wuspěšne“, rěka w policajskej rozprawje.
Njeplanowany wustup psa na koncerće Wienskeho komorneho orchestra w Turkowskej je jako widejo w interneće wulce prašany. Labrador bě 20. junija na jewišćo amfiteatra w Ephesusu přiběžał a měješe při hudźbje Felixa Mendelssohna Bartholdyja wočiwidnje wjele wjesela. Sydny so pódla huslerja na zemju, zo by so połnje na hudźbu koncentrował. Wopytowarjo spontanje přikleskowachu.
Swinjaca mrětwa w Čěskej
Zlín/Berlin (dpa/SN). Po prěnich padach afriskeje swinjaceje mrětwy w susodnej Čěskej namłwja Zwjazk hońtwjerjow Němskeje swojich čłonow k „alarmowej hotowosći“. Hajnicy dyrbjeli weterinarny zawod hnydom informować, su-li něšto njewšědneho registrowali, rjekny wiceprezident zwjazka Wolfgang Bethe. Čěscy weterinarojo su dźensa w laborje třeći pozitiwny pad mrětwy zwěsćili. Mortwe dźiwje swinjo běchu hajnicy njedaloko morawskeho Zlína našli, 300 kilometrow wuchodnje Passauwa.
Zaso mjenje bjezdźěłnych
Kamjenica (dpa/SN). Ličba bjezdźěłnych w Sakskej je nowu najnišu hódnotu docpěła. W juniju bě po informacijach sakskeje regionalneje direkcije dźěłoweje agentury w swobodnym staće 135 729 ludźi bjez dźěła, 16 000 mjenje hač loni w juniju. Kwota bjezdźěłnosće zniži so wot 6,6 na nětko 6,4 procenty. To je najniši staw po zahajenju statistiki bjezdźěłnosće, kaž dźěłowa agentura zdźěla.
Wulka horcota w Grjekskej
Zwjazkowa stolica je wčera zliwk lětstotka dožiwiła. Wot ...
Turkowska rozhorjena
Zakaz připućowanja w USA zaso płaćiwy
Zwjazkowy sejm „mandźelstwo za wšěch“ schwalił
Berlin (dpa/SN). Z historiskim rozsudom je zwjazkowy sejm dźensa „mandźelstwo za wšitkich“ schwalił. Mjez cyłkownje 623 wotedatymi hłosami je so wjetšina 393 zapósłancow za dospołne prawniske runostajenje homoseksualnych porikow wuprajiła, 226 parlamentownikow hłosowaše přećiwo tomu, štyrjo so hłosa wzdachu. Zwjazkowa kanclerka Angela Merkel (CDU) bě z „ně“ hłosowała, kaž po tym zdźěli.
SPD, Zeleni a Lěwica běchu wothłosowanje přećiwo woli CDU/CSU přesadźili. Znajmjeńša 70 zapósłancow unije, potajkim kóždy štwórty, wotěrowaše za naćisk Zwjazkoweje rady.
Do debaty bě wjetšina zapósłancow wobzamknyła, wothłosowanje na dnjowy porjad přiwzać. Prezident zwjazkoweho sejma Norbert Lammert (CDU) na to namołwješe „mjezsobny respekt wobchować, kotryž sej wobě poziciji bjezdwěla zasłužatej“.
To a tamne (30.06.17)
Psyči problem měješe Mnichowska wohnjowa wobora wčera rozrisać: Pos bě w lifće zawrjeny, jeho wobsedźerjo pak steještaj před nim. Prawdźepodobnje bě so psyči powjaz w durjach zapopadnył, tak zo so hižo njewotewrěchu. Tež sobudźěłaćer klučoweje słužby njemóžeše pomhać. Hakle powołanska wohnjowa wobora blokowane durje skónčnje wočini a Jack Russella wuswobodźi.
Hdyž sy alkohol pił, da awto radšo stejo wostaj. Tole je mužomaj w starobje 26 a 27 lět na awtodróze do mysli přišło. Tak zastaštaj na nuzowej čarje na A 29 pola Cloppenburga a lehnyštaj so spać. Zastojnikaj awtodróhoweje policije dyrbještaj chětro raznje klepać, zo byštaj jeju wubudźiłoj. Test alkohola wunjese 2,3 a 2,8 promilow. Jedyn tamneho winowaše, zo je jěł. Policisća dachu awto ze strašneho parkowanskeho městna wotwlec.
Wo Erdoğana njerodźa
Moskwa (dpa/K/SN). Zwjazkowe knježerstwo chce planowanu narěč turkowskeho prezidenta Recepa Tayyipa Erdoğana na kromje wjerška G 20 w Němskej zakazać. To je zwjazkowy wonkowny minister Sigmar Gabriel (SPD) dźensa w Moskwje připowědźił. „Zdźělimy Turkowskej, zo tajki wustup w Němskej móžny njeje“, wón rjekny. Pozicija je ze zwjazkowej kanclerku Merkel (CDU) dorěčana. Erdoğan bě oficialnje próstwu podał, směć w Němskej k swojim krajanam porěčeć.
Kardinal zastojnstwo złožił
Sydney/Rom (dpa/SN). Jedyn z najwyšich rjadnych kardinalow Vatikana, za financy zamołwity George Pell, je hladajo na wumjetowanja znjewužiwanja dźěći w swojej awstralskej domiznje dla zastojnstwo nachwilnje złožił. Bamž Franciskus je tole Pellej dowolił, zo móhł w Awstralskej swoju njewinowatosć dopokazać, kaž dźensa rěkaše. W Awstralskej běchu njedawno přećiwo 76lětnemu přepytować započeli. Pell dyrbi 18. julija na sudnistwje w Melbournje wuprajić.
Italska žada sej wjace pomocy
