Měrnje a wjesele swjećili
W Lipsku běchu zarjady a policija derje na CSD přihotowane
Lipsk (dpa/SN). Tydźeń po protestach prawicarskoekstremnych skupin na zarjadowanju Christopher Street Day (CSD) w Budyšinje su dźesaćitysacy ludźi w Lipsku wjesele a měrnje zhromadnje swjećili. Cyłkownje wobdźěli so na paradźe po informacijach policije 19 000 wosobow.
Demonstracija prawicarjow bě přizjewjena, tola njeměješe wulkeho wuskutka. Wjacorych přeńdźenjow dla je organizator demonstracije zarjadowanje zakónčił. Tež zarjadowanja přećiwo prawicarjam su měrnje wotběželi. Powšitkownje bě prawicarjam zakazane so do centruma města podać. Dohromady zwěsći policija nimale 80 přeńdźenjow a něhdźe 40 chłostajomnych njeskutkow.
Zwjazkowa policija z Pirny w socialnej syći X zdźěli, zo běchu wobdźělnicy prawicarskeho protesta hižo agresiwni do Lipska přijěli. Tohodla zarjady w centrumje města wšitke zhromadźizny w tutym konteksće zakazachu. Parada CSD pak móžeše so měrnje přewjesć.
Najnapjećiše wólby
Předewzaće podpěruje woboru
Přebytk dlěje traje
Washington (dpa/SN). Něhdźe tydźeń dyrbješe zasadźenje astronawtki Sun Williams a jeje kolegi Barryja Wilmora na swětnišćowej staciji ISS trać, mjeztym pak su to hižo tři měsacy. Swětnišćowa łódź z mjenom „starliner“, z kotrejž staj na ISS přilećałoj, ma techniske problemy. NASA dyrbi tuž rozsudźić, kak nětko dale postupuja. Hač do kónca měsaca dyrbja wujasnić, kak měłoj astronawtka a astronawt zaso přizemić.
Fachowcy wo dwěmaj móžnosćomaj diskutuja. Tak móhli so ze „starlinerom“ nawróćić, štož pak je wulke riziko. Techniske problemy měli spytać rozrisać. Abo wonaj čakataj na lět z „Dragon“ klětu we februaru. Za to pak trjebataj hišće woblekaj. Jeju čas na ISS móhł so tuž na wosom měsacow podlěšić.
To a tamne (19.08.24)
Derje schował je so třilětny hólčec w Neckarsulmje pola Heilbronna. Staršej za nim pytaštaj, ale jeho njenańdźeštaj. Tuž běštaj přeswědčenaj, zo je so hólc z domu zhubił a staj na policiju zazwoniłoj. Podarmo zastojnicy wokoło domu za nim pytachu a tuž hišće raz dokładnje bydlenje přepytachu. Kaž so wukopa, je so třilětny w kamorje schował a měješe wulke wjeselo na chowance. Staršej a hólc z konsekwencami ze stron policije ličić njetrjebaja.
Z wopicoweje hory Salem ćeknjene młodźatko je kedźbnosć w regionje Bodamskeho jězora wubudźiło. Po jednej nocy w swobodźe su policisća wopicu skónčnje na jabłučinje blisko stanowanišća popadnyli. Kaž policija sobotu zdźěli, bě wone po wulěće chětro mučne.
Ministerstwaza jedne blido!
Wokrjes Serbam swěru poboku
Dešno (SWN/mb). Prěni raz staj so nowy krajny rada wokrjesa Dubja-Błóta (LDS) Sven Herzberger a předsyda Domowiny Dawid Statnik na dźěłowu rozmołwu zetkałoj. Na rozmołwje w domizniskim muzeju w Dešnje su so tež jednaćel Domowiny Marcus Końcaŕ, regionalna rěčnica Heike Apeltowa, nawoda Rěčneho centruma WITAJ (RCW) w Choćebuzu, Bernd Melcher, koordinator młodźinskeho dźěła Domowiny w Delnjej Łužicy, Tobias Unger, čłon zwjazkoweho předsydstwa a nawoda projekta Zorja Maksimilian Hasacki, předsydka braniborskeje rady za serbske naležnosće Katrin Šwjelina a šefina Šule za delnjoserbsku rěč a kulturu Uta Henčelowa wobdźělili. Krajnej radźe poboku bě społnomócnjena za serbske naležnosće wokrjesa Sabrina Kušcyna.
W rozmołwje su wosebje žiwu dwurěčnosć, pěstowanje serbskich nałožkow a podpěru wokrjesa LDS za woboje rozjimali. Nawjazujo na dwurěčne pomjenowanje 80 busowych zastanišćow skedźbni Herzberg, zo njeje jenož serbski lud, ale tež komunalna politika za to zamołwita, serbšćinu zdźeržeć. Předsyda Domowiny bě na rozmołwu přeprosył.
Druhi raz žona na čole
Bangkok (dpa/SN). Druhi raz w swojich stawiznach změje Thailandska žonu jako nawodnicu knježerstwa: Hakle 37lětna Paetongtarn Shinawatra, předsydka knježerstwoweje strony Pheu Tahi a dźědźićelka wulce bohateje dynastije, bu dźensa na ministersku prezidentku wuzwolena. Wona je najmłódša ministerska prezidentka kralestwa na juhowuchodźe Azije wšěch časow. Hakle před dwěmaj dnjomaj bě wustawowe sudnistwo něhdyšeho ministerskeho prezidenta wotsadźiło.
Loni mjenje CO2 emisije
Stuttgart (dpa/SN). Analyza je wuličiła, zo su předewzaća DAX swoje emisije škódnych klimowych płunow loni znižili. Přirunujo z 2022 spadnychu direktne emisije wot 218 na 189 milionow tonow CO2, a tak wo někak 14 procentow. Přepytowanske a poradźowanske předewzaće EY bě za to rozprawy wo wudźeržliwosći 40 zawodow analyzowało. W tutych dokumentuja swoje prócowanja wo neutralitu klimy.
BSW do knježerstwow?
