Wólbny bój na wuchodźe Němskeje pokazuje najwjetšu starosć wolerjow

Erfurt/Drježdźany (dpa/SN). Załožerka strony BSW Sahra Wagenknecht chce jednanja wo móžnych koalicijach na stejišćo partnerow k wójnje w Ukrainje wjazać. „Wobdźělimy so jenož na krajnym knježerstwje ze stronu, kotraž so tež na zwjazkowej runinje za diplomatiske rozrisanje a přećiwo dalšim wójnskim přihotam wupraja“, rjekny předsydka Zwjazka Sahry Wagenknecht durinskim nowinarjam. Jasne je, „zo žerje dalše napřemobrónjenje miliardy eurow, kotrež trjebamy nuznje za šule, chorownje, bydlenja a wyše renty“.

W septembrje wola ludźo w Sakskej, Durinskej a Braniborskej nowe krajne sejmy. Strona Wagenknecht staja při tym nimo kubłanja a migracije tež měr do srjedźišća. To wunjese jej w tutych třoch krajach 15 do 20 procentow přihłosowanja. Tež AfD so tutej temje wěnuje. Wobě stronje stej přećiwo dalšemu dodawanju brónjow do Ukrainy a za hnydomne jednanja Ukrainy z Ruskej.

Do debaty wo měr so dźensniši datum derje hodźi: Runje před 110 lětami, 29. julija 1914, padnychu prěnje wutřěle Prěnjeje swětoweje wójny. Tehdy běchu ludźom w Němskej dołho dosć napowědali, zo su Francozojo a Britojo tajke něšto kaž jich přirodni njepřećeljo. Wotpowědujo tomu ćehnjechu wojacy z wulkej zahoritosću do wójny a do wěsteje smjerće. Dźensa słyšimy podobne zwuki hladajo na Rusku. Rozdźěl k lěće 1914 wobsteji w tym, zo ludźo wjace wšitko njewěrja. Nic naposledk njejsu tež zahubu wo wjele hóršeje Druheje swětoweje wójny hišće zabyli, kotraž je tež serbsku Łužicu surowje trjechiła. Mje njedźiwa, zo maja politikarjo kaž zakitowanski minister Boris Pistorius (SPD), kotrehož je načolna kandidatka sakskeje SPD Petra Köpping njedawno do Drježdźan přeprosyła, najwjetše problemy, ludźom scyła něšto rjec. Politiske strony – wšojedne, kak rěkaja – kiž prěduja ludźom wójnu, njetrjebaja so dźiwać, zo jich nichtó njewoli. A to je derje tak. Marko Wjeńka

Němske mišterstwa w suwanju po mórskim błóće su kónc tydźenja w sewjernomórskim Dangasće přewjedli. Při tym dyrbjachu wobdźělnicy 150 metrow błóćaneje čary na drjewjanym suwadle zmištrować, z jednej nohu klečo na krosnje, z druhej so wotsuwajo. Něhdźe tysac ludźi je sej spektakl wobhladało, kotryž wotmě so mjeztym dźesaty króć we wobłuku festiwala. Na nim přewjeduja nimo toho koncerty a informaciske zarjadowanja wo jónkrótnym watowym morju.

Do kupnicy zabłudźił je so młody sornik w Landsbergu pola Halle. Młode zwěrjo njeje drje wjace wuchod wobchoda namakało, běhaše panisce mjez regalemi a njeda so změrować. Sobudźěłaćerjam so skónčnje poradźi, sornika do składa zaćěrić a tam zamknyć. Přiwołanaj hajnikaj zwěrjo popadnyštaj a na susodnym polu do swobody pušćištaj.

Minsk (dpa/SN). Běłoruska statna telewizija je Němca zjawnosći předstajiła, kotrehož bě sudnistwo w Minsku před dnjemi k smjerći zasudźiło. We wusyłanju prošeše muž mócnarja Aleksandera Lukašenka wo hnadu. Němske knježerstwo ničo za jeho pušćenje nječini, wón skoržeše. Sudnistwo bě jeho terorizma w nadawku ukrainskeje tajneje słužby dla k smjerći zasudźiło. „Wuznawam swoju winu, definitiwnje“, wón rjekny. W Běłoruskej zasudźenych zatřěla.

Scholz za dalše kontrole

Saarbrücken (dpa/SN). Zwjazkowy kancler Olaf Scholz (SPD) spušća so w boju přećiwo njeregularnej migraciji na pomjezne kontrole. Generelnje je planowane, mjezy Němskeje dale raznje kontrolować, rjekny Scholz nowinarjam. Tak chcedźa ilegalnu migraciju wobmjezować, kaž bě wón to připowědźił. „Dyrbimy ličby znižić“. Tež při mjezach Awstriskeje, Šwicarskeje, Čěskeje a Pólskeje hižo dlěši čas kontroluja, zo bychu ilegalnu migraciju wobmjezowali.

Compact wobara so sudnisce