Knježerstwo chce ratarjow podpěrać
Podstupim (dpa/SN). Braniborski ministerski prezident Dietmar Woidke (SPD) chce hladajo na trajace protesty ratarjow dale za rozrisanjemi pytać, kak móhło knježerstwo agrarnu branšu wolóžić. Po wčerawšim zetkanju z ratarjemi w Podstupimskej statnej kencliji wón přilubi, zo dyrbi so běrokratija w tymle wobłuku wottwarić. Nimo toho chce wón za pućemi pytać, kak móhli so ratarske zawody ze špatnymi pódami financielnje podpěrać. Woidke ma wčerawšu rozmołwu za prěnju wažnu kročel. Dźensa měješe so hižo kabinet z tym zaběrać. Braniborske knježerstwo zdobom připowědźi, zo chce so za šěsć do wosom tydźenjow znowa z krajnym burskim zwjazkom wo namjetach k wottwarej běrokratije wuradźować. Zdobom dyrbi so dźěłowa skupina zarjadować.
Znowa wčera burja při namjeznym přechodźe w Frankfurće nad Wódru přećiwo planowanym skrótšenjam zwjazkoweho knježerstwa protestowachu.
Wojerske nadpady zakónčić
Gaza/Tel Aviv (dpa/SN). Israelske wójsko na juhu Gazaskeho pasma dale wojuje a dźensa zdźěli, zo su „wjace hač 30 teroristow“ morili. Wójsko chce kónčinu ze „zaměrnymi nadpadami na infrastrukturu teroristow“ kontrolować.
Pomocne organizacije skedźbnjeja na katastrofalne wobstejnosće na juhu Gazaskeho pasma, hdźež so hižo tydźenje sylnje wojuje.
China je Israel namołwjała, wojowanja na juhu Gazaskeho pasma zakónčić. China so wuwića w regionje Rafah dla starosći a wotpokazuje kóždu akciju, kotraž ciwilistam škodźi, zdźěli dźensa wonkowne ministerstwo w Pekingu. Israel měł swoje „wojerske operacije tak spěšnje kaž móžno zastajić“ a wšitko za to činić, wjetšej humanitarnej katastrofje zadźěwać. We wójnje přećiwo islamistiskej Hamas hotuje so Israel tuchwilu na wojersku ofensiwu na Rafah, blisko mjezy do Egyptowskeje. Plany israelskeho knježerstwa město z wjele palestinskimi ćěkancami nadpadnyć, mjezynarodnje wulku kritiku zbudźi.
„Prawo je na stronje přirody ...“
Někotre hłosy hladajo na róčnicu „rumowanja“ campa „Heibo-aktiwistow“
Ottendorf-Okrilla (dpa/SN). Gmejna Ottendorf-Okrilla bu nadregionalnje znata, jako zaćahny policija loni 15. februara do wobłuka lěsa Łužničanskeje hole z mjenom „Heidebogen“ (Heibo), zo by wobswětowych aktiwistow ze swojich štomowych domow „wuhnała“ a tak areal za zdobywanje šćerka „wuprózdniła“. Nětko, lěto po tym, su štomy wšitke porubane, rjećazowe piły su womjelknyli – přirodoškitarjo a aktiwisća pak to njejsu.
Komunikacija bytostna
Zwjazkowe knježerstwo chce dale subwencije za ćěriwa ratarjam krok po kroku přikrótšić. Tež protesty potrjechenych ničo na tym njezměnichu. Wčera zetka so braniborski ministerski prezident Dietmar Woidke (SPD) z ratarjemi a je z nimi rěčał. Skónčnje!!! Ze stron zwjazkoweho knježerstwa drje běchu spočatk procesa reakcije. Tola mjeztym wšitcy zaso mjelča. Porno tomu wěnuje so zwjazkowy ratarski minister Cem Özdemir (Zeleni) nowemu dawkej za mjaso. Město toho pak měł wo tym rozmyslować, kak móhł ratarjow podpěrać. Postupowanje Woidki mam za mudre. Hdyž-li z potrjechenymi rěčiš, hodźa so situacije rozrisać. A tole potrjechi wšitke žiwjenske wobłuki. Podarmo wšak njerěka, zo zmóžnja komunikacija transparencu a dowěru. Runje dowěra blišemu je tola zakład za wuspěšnu politiku. Jelizo wolerjo politikarjam dowěrja, budu woni jich tež wolić. Městno swójsku ideologiju zwoprawdźić, hižo žanoho njeje.
Bianka Šeferowa
To a tamne (13.02.24)
W sewjernej Posaarskej wčera ćeknjeny kenguru je zaso pola swojeje wobsedźerki we Wadernje. Kaž policija dźensa zdźěli, je wona zwěrjo wuspěšnje přiwabiła. 40lětna šoferka awta bě wčera kenguru na dróze wobkedźbowała. Dokelž je žona z toho wuchadźała, zo jej to nichtó njewěri, wona zwěrjo jako dopokaz fotografowaše.
Awto 27lětneho je so w Drježdźanskim měšćanskim dźělu Laubegast do Łobja sunyło. Kaž wohnjowa wobora wčera zdźěli, je šofer zawčerawšim wječor swoje awto při přibrjohu wotstajił a so do picerije podał. Krótko po tym přidružichu so pasanća do hosćenca a powědachu, zo su awto we Łobju wuhladali. 27lětny je jenož hišće přihladował, kak so awto podnuri. Zawołana wohnjowa wobora je bjez wuspěcha za jězdźidłom we Łobju pytała.
Pobrachowacy dorost je problem
Na lětušej hłownej zhromadźiznje Towarstwa Cyrila a Metoda (TCM) minjeny pjatk w Baćonju rozprawjachu kooperacije a sekcije wo swojej dźěławosći. Zdobom schwalichu čłonojo TCM nowe wustawki.
Baćon (SN/BŠe). Towarstwo Cyrila a Metoda so zaměrnje dale za křesćanske žiwjenje w Hornjej Łužicy angažuje. Wo tym móžachu so čłonojo TCM minjeny pjatk w Baćonju přeswědčić, jako słyšachu rozprawy jědnaće sekcijow a kooperacijow zańdźeneho lěta.
Eks-mandźelska swědk w procesu
Budyšin (dpa/SN). W procesu přećiwo podhladnemu, kotryž je prawdźepodobnje loni 4. awgusta ewangelsku cyrkej we Wulkich Rědorjecach (Großröhrsdorf) zapalił, je Zhorjelske krajne sudnistwo w Budyšinje zańdźeny tydźeń něhdyšu mandźelsku 41lětneho muža jako swědk na jednanje prosyło.
Wona wupraji, zo běše dźeń po wohenju list namakała, w kotrymž hrožeše podhladny, zo chce zhromadne dźěći wotwjesć a zo chce bydlenje, staršiski dom a měšćansku cyrkej, w kotrejž buštaj něhdy wěrowanaj a jedne z jeju dźěći wukřćene, zničić. Něšto dnjow do toho hižo běše žona wobruče swojeho, kaž tež awta swojeho žiwjenskeho partnera, rozkałnjene nadešła. Z decembra 2022 sem staj mandźelskaj sudnisce dźělenaj. Po dźělenju je něhdyši partner „dźeń a agresiwniši był“, tak žona rozprawješe. Mjez druhim je so najebać zakaza „dźěćom bližił“, je zatrašał. Nimo toho tež hrožeše, zo so samoho mori.
K zazběhej procesa je hłowny podhladny swój njeskutk zaprěł. Zdobom pak přida, zo je w nocy wohenja blisko cyrkwje přebywał.
Dowol na hračkach?
Lipsk/Drježdźany (dpa/SN). Na lětanišćomaj Drježdźan a Lipsk/Halle je dźensa wulki dźěl lětow wotprajeny. Přičina toho su warnowanske stawki sobudźěłaćerjow. Dowolowe plany tysacow pasažěrow steja na hračkach. W Sakskej su so minjeny kónc tydźenja zymske prózdniny zahajili. Dźěłarnistwo ver.di bě sobudźěłaćerjow k 48hodźinskim stawkam namołwjało. W nocy na jutře ma wobchad po planje zaso móžny być.
W tworni zaso dźěłaja
Grünheide (dpa/SN). W tworni elektroawtow Tesla w Grünheide sobudźěłaćerjo nětko zaso jězdźidła produkuja. Kaž twornja dźensa zdźěli, su přistajeni w nócnej słužbje produkciju zahajili. Kónc januara dyrbjachu přechodnje přestać dźěłać, dokelž je wjele dźělow awtow pobrachowało. Wina na tym běchu nadpady Huthi-rebelow w Čerwjenym morju. Transportne puće su nětko dlěše, dokelž pytaja łódźe za druhimi čarami. Twornja ma tuchwilu 12 500 přistajenych.
Přećiwo planowanej fabrice
Wjace hač 3 500 sobuskutkowacych w 60 wobrazach ćehnješe wčera ...
Wólby wotbłyšćuja měnjenje ludźi
Berlin (dpa/SN). W někotrych dźělach Berlina wčera wólby zwjazkoweho sejma wospjetowachu. Předewšěm strona FDP je po tym ćerpjeła, a jedne městno w sejmje zhubiła. Zwjazkowemu sejmej přisłuša w přichodźe hišće 735 zapósłancow, mjez nimi jenož hišće 91 z FDP, kaž nawodnica zwjazkowych wólbow w nocy na dźensa wozjewi. Za druhe strony njeje so ličba změniła.
Tež poměry wjetšiny w parlamenće so njezměnja. Procentualne změny pak su pokazka wolerjow a wotbłyšćuja měnjenje wolerjow. Opoziciskej stronje CDU a AfD stej wjace hłosow dóstałoj. Amplowej stronje SPD a FDP je mjenje wólbokmanych woliło. Zeleni su přibližnje samsnu ličbu hłosow wolerjow dóstali.
Po wuslědku wostanje SPD najsylniša strona z 22,2 procentaj hłosow (-1,2 procentaj), po tym sćěhuja Zeleni z 22,0 procentami (-0,3). CDU polěpši so na 17,2 procentaj (+ 1,3) a AfD na 9,4 procenty (+ 1,0). FDP wolichu 8,1 procent -0,9) ludźi. Lěwica je swój wuslědk 11,5 procentow (+0,1) zachowała.
