Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (46)
Hač je kóń na pastwje abo wosrjedź přirody při wujěchanju, móžnosće zajědojćenja su mnohostronske. Wotwisnje wot družiny a mnóstwa jěda a kak maćizna w žiwym organizmje reaguje, wuwiwaja so wšelke symptomy schorjenja.
Powšitkownej symptomaj zajědojćenja konja stej na přikład zymica a sylne poćenje. Móžne su tež wuražki (Ausschlag) na koži abo problemy při požiwanju. Po přijeću wjetšich mnóstwow jědojteje maćizny dóńdźe k apatiji abo wutwori so ješć při klamje. Hišće hórje je, hdyž widlišća (Krämpfe), ćeže widźenja abo zlemjenja k tomu přińdu.
