Sydom volleyballistow ST Marijineje hwězdy je přeprošenje na 18. nazymski turněr SSV 1862 Langburkersdorfa w sakskim Neustadće sćěhowało. Poprawom bě wobdźělenje Pančičanow winowatosć, wšako su woni turněr minjene tři lěta za sobu dobyli a běchu tak zakitowar pućowanskeho pokala. A nětko móhli sej pokal na přeco sobu wzać.
Na lětušim turněrje wobdźěli so dwanaće mustwow. Wotprajiłoj běštej sobufaworitaj Crazy blues a WSG Stürza. To pak njerěkaše, zo bě předkoło za Marijinu hwězdu mědlizanje. Hnydom prěnju sadźbu woni přěhrachu, přichodnu wšak z wulkim předskokom dobychu. Tež w druhej hrě dnja mějachu spočatne ćeže, tak zo dosahaše w prěnim přechodźe jeno za njerozsudny wuslědk. Dalši přechod a slědowace tři hry předkoła pak suwerenje za sebje rozsudźichu.
