Hižo wjacore lěta honitaj Mikławškec bratraj Křesćan a Michał we Worklečanskim prěnim blidotenisowym mustwje zhromadnje za celuloidowym bulikom. Po zazběhu sezony 2015/2016 a wjacorych hrach je sej sportowa redakcija Serbskich Nowin interview z kapitanom mustwa Michałom Mikławškom wuprosyła.
Kak posudźuješ dotalnu połseriju w prěnjej wobwodnej lize w prěnim blidotenisowym mustwje Viktorije Worklecy?
M. Mikławšk: Po spočatnych problemach, kotrež zawěsće nastachu, dokelž běchmy přemało trenowali, smy dotal te hry dobyli, w kotrychž běchmy faworit. Bohužel pak mějachmy dosć partijow, w kotrychž faworitej snadnje podležachmy. Tež w tajkich hrach budźemy spytać sej w druhej połseriji dypki wuwojować.
Tučasnje stejiće na sedmym městnje tabulki z wurunanej bilancu: štyri dobyte hry a štyri snadne poražki. Mysliš sej, zo maće hišće móžnosć, do boja wo prědnje městna zapřimnyć, abo dyrbiće skerje na to kedźbować, zo njezestupiće?
