Prěni raz w sportowych stawiznach Serbskeho gymnazija Budyšin (SGB) docpě basketballowe mustwo finale krajneho wurisanja „Młodźina trenuje za olympiju“.

Sydom basketballistow Serbskeho gymnazija Budyšin postara so njedawno w Radworju wo sensaciju. Na regionalnym finalu minjenu srjedu docpěchu hrajerjo wokoło kapitana Pětra Dźisławka w starobnej klasy II (8. do 11. lětnik) 1. městno a tak kwalifikaciju za kónčne wurisanje našeho kraja. Po kopańcy, volleyballu, blidotenisu a beachvolleyballu je to pjata sportowa družina, w kotrejž so šulerjo SGB z najlěpšimi tamnych regionow Sakskeje wubědźuja. Do wuspěšneho mustwa SGB słušachu z Pětrom Dźisławkom z Chasowa, Paulom-Georgom Gallwasom z Budyšina a Janom Šołtu z Hornjeje Kiny třo aktiwni hrajerjo Budyskeho MSV 04. Woni tworjachu z dalšimi hrajerjeami homogeny cyłk. Z radosću bě wobkedźbować, kak dokładnje sej bul přihrawaja, kak spěšnje jich kontery k dypkam wjedu a kak jedyn za druheho wojuje.