Berlinski AK 07

– FSV Budissa Budyšin 1:1 (0:0)

Zestawa Budissy: J. Jakubov – Kolan, Klippel, Pfanne, Čermák, Hoßmang, Hausdorf (90. A. Jakubov), Kral, Reher, Walther (82. Rupf)

W němskej stolicy měješe Budissa Budyšin pola Berlinskeho AK ćežki nadawk, wšako bě tón hižo wjacorym faworitam nohu podtyknył. Trenar Budissy Tomaš Henčl pak chcyše ze swojim cyłkom přiwšěm wuspěšnje hrać. Bohužel dyrbješe Ezequiel H. Rosendo hižo zahe kopanišćo wopušćić. Prěnju šansu za hosća měješe Budyski top-nadběhowar Paul-Max Walther. Třělwa z kónčkojteho kuta pak dźěše snadnje nimo. Tež Waltherowy wólny kop ze zdalenosće 18 metrow wrota misny. Budyšenjo hru kontrolowachu a wšitke přećiwniske nadběhi před šěsnatku wotpopadnychu. Při wólnym kopje přećiwnika bě Jakub Jakubov na městnje a třělwu wotwobara. Hač do přestawki wotměwaše so hra mjez šěsnatkomaj a mjezywuslědk rěkaše tuž 0:0.