Sernjany swjeća lětsa prěnje pisomne naspomnjenje wsy před 600 lětami. Rodźeny Sernjančan a dobry znajer stawiznow delanskich wsow Pawoł Rota je někotre stawizniske zajimawostki wo wsy zestajał, kotrež čitarjam Serbskich Nowin we wjacorych dźělach spřistupnjamy:

Ze započateje wjesneje chroniki

Spočatk lěta 1956 dóstach so do powołanskeho serbskeho nowinarskeho dźěła. To je mje tež do nimosłužbneho pisanja dowjedło. Wězo fotografowanje k tomu słušeše. Kamera mje na wšěch pućach přewodźeše, často mi puće runjewon postaješe.

Wonu julijsku sobotu w lěće 1958 připołdnju po dźěle z motorskim z Budyšina domoj do Sernjan jěduceho mje hižo za městom porjadny šwihel dešća překwapi. Pod mostom awtodróhi so schowach. Na dalšim puću ani tajke mosty ani druhe chowanki njemějach. Tuž wězo šwarnje zmoknych. Kak sym swoju kameru suchu wuchował, sym dawno zabył. Je dźě so mjeztym 60 lět minyło.