W přirodźe a wosebje kołowokoło ptačkow so Handrij Baumgärtel z Bronja jara derje wuznawa. Dźěćiznak je so pola njeho wobhonił, što móže nam tuchwilu zajimaweho rozprawjeć.
Rjane wjedro dźěći wabi so pod hołym njebjom zaběrać. Što móža wone w přirodźe tuchwilu wobkedźbować?
H. Baumgärtel:
Přiroda je wotućiła a wšudźe wšitko kćěje. Wosebje w lěsach abo při hatach widźiće wšelake dźiwje kwětki. Nimo toho je tam wjele ptačkow, kotrymž móžeće připosłuchać. We wjerškach štomow je na přikład ćichimichał (Pirol) žiwy. Tež mjetelčki móžeće wobkedźbować, předewšěm žołtuški (Zitronenfalter). W hatach płuwaja wšelake družiny kačkow. Zo móhli jim přihladować, pak maće so ćicho zadźeržeć a so cyle mjelčo pohibować. Hewak wone spěšnje wotleća. W přirodźe wobchowajće tuž stajnje měr, a tak móžeće sej wšelake potajne zwěrjata wotkryć.
Mnohe ptački su so ze swojich zymskich kwartěrow nawróćili. Maja wone tu dobre wuměnjenja přežiwić?
