Z digitalnymi medijemi so rozestajeć bě zaměr našeho projekta na Serbskej wyšej šuli „Michał ­Hórnik“ we Worklecach. Z pomocu dźěłarničkow, přednoškow a eksperimentow zaběrachmy so z naj­wšelakorišimi wobłukami digitalneho swěta. Nam su rozdźělne projekty zmóžnili, so do temow zanurić. K tomu słušachu astrofyzika, fotografija, coding, medijowe prawo, planetarij, laserowa grawura, kumštna inteligenca (KI) a mnohe dalše. Naši wučerjo su nam grat za kooperaciju w lernsax, ppt, ale tež podcast zbližili a nam pokazali, kak móžemy wideja spěšnje hromadźe zestajeć a přitřihać. Ale tež printowe, to rěka ćišćane medije běchu z woprawnjenjom do digitalneho projekta zapřijate. Wolontar redakcije Serbskich Nowin Maximilian Gruber, nawoda dźěłarnički, je nam sta­wizny a dźěło redakcije Serbskich Nowin zbližił a nam natwar nowin cyle powšitkownje rozkładł. Zdobom předstaji wšědny dźeń žurnalista. Dalša ćežišćowa tema běše, kotre nowinske artikle su móžne. Smy samo­statnje wosobinski profil nam znateje wosoby, sobušulerki resp. sobušulerja, nadźěłali.