Wosebitu atmosferu Błótow w zymje dožiwić móžeš na wosebitym zarjadowanju. Błótowski muzej a wulki přistaw w Lubnjowje je prěni a druhi kónc tydźenja adwenta poskićatej. Za „Hodami w Błótach“ chowaše so za hosći minjeny kónc tydźenja čołmowanje po z ćeńkej worštu loda pokrytej Sprjewi do Lědow. Do tołstych přikrywow zababjeni wopytowarjo na čołmje zymu mrěli njejsu. W lagunowej wsy witachu jich adwentne wiki w muzeju pod hołym njebjom ze swětom, kajkiž běše před sto lětami w Błótach.
Mócnje storka Marko Schröter swój połnje wobsadźeny čołm přez ćeńki lód. Z woteběracymi temperaturami wječor mějachu so čołmarjo z tym bědźić, zo tworješe so na wjesle lód. Někotrym z nich běše to cyle nowy zjaw. Wopušćejo wulki Lubnjowski přistaw, je jim přistawny kapitan „Hermann Petersen“ kiwał. Tutu rólu bě Matthias Ullrich přewzał. Wón pochadźa z Niedervogelgesanga blisko Łobja, měšćanskeho dźěla Pirny. „Hižo to mje na sprjewineho kapitana powyša“, wón wćipnje so prašacym z posměwkom wujasni.
