Partneraj, pochadźacaj z rozdźělneju kulturow, twaritaj sej hnězdo we wili fabrikanta

Cyle na kóncu přewšo dołheje wsy Mikulášovice w susodnej Čěskej wotboči mólička ­šćežka doprawa. Na samym kóncu je wulka ležownosć. Tamnišu wilu něhdyšeho ­fabrikanta wobnowitaj Petr Pánek a jeho mandźelska Žaneta. Pozdźišo maja pódlanske twarjenja sćěhować. Zhromadnje ze synom Joachymom tworitaj cyle wosebity cyłk. ­Milenka Rječcyna je swójbu ­wopytała.

Kak dóstanje so młoda swójba do imobilije, kotraž wobsedźerja wužaduje?

Ž. Páneková: Wědźach, zo ma Petr wotpohlad, sem ćahnyć. Ja pak to najprjedy chcyła njejsym. Pochadźam ze wsy Horní Poustevna. Tam pak bydla jenož hišće stari ludźo, młodźi woteńdu. Něhdźe 300 wobydlerjow we wsy hišće je. Tuž, što wo to? Słušamoj hromadźe. A mjeztym sym so na to zwučiła.