Hamorčan Gerhard Stübner je hižo dźesać lět přistawny mišter při Bjerwałdskim jězoru

Runje běše Hamorska milinarnja hišće widźeć, naraz pak so z čornych, ćežkich mróčelow jenož tak kida. Wo idylce kaž na pohladnicy – ze słóncom, wodu, swětłownju, płachtakami a dalšimi čołmami kaž tež z milinarnju w pozadku – na wonym mejskim dnju rěčeć njemóžu. Prědku so čołmy na žołmach kolebaja. Bóle zady bydlenske čołmy za dowolnikow majestotnje na wodźe leža. Po słónčnych swjatkach z tójšto wopytowarjemi je nimale tydźeń pozdźišo znajmjeńša na chwilku wěsty měr zaćahnył.