Před něšto wjace hač třomi lětami je 53lětny Rico Ziegenbalg z Lichtenberga pjekarnju w Čornochołmčanskim Krabatowym młynje přewzał. Dwě lěće pozdźišo započa tam tež 42lětny Sebastian Weidelt ze Złeho Komorowa dźěłać. Milenka Rječcyna je so z nimaj rozmołwjała.

Što je Waju k tomu pohnuło w pjekarni w Krabatowym młynje dźěłać?

R. Ziegenbalg: Za to njebě wjele přerěčenja trjeba. Běch runje swójsku pjekarnju zawrěł, to dóńdźe naprašowanje z Čorneho Chołmca. Rady praju, zo běše rozsud, w Krabatowym młynje dźěłać, prawy. Móžu tu rjemjesło pjekarja połnje wukonjeć. Mamy bursku pěc, pječemy na tradicionalne wašnje po starych recepturach a bjez hotowych měšanych mukow.

S. Weidelt: Tobias Čižik, jednaćel Kulturneho centruma Krabatowy młyn Čorny Chołmc ptzwr, je zazwonił a so mje prašał, hač chcył na beneficnym zarjadowanju za Ukrainu pomhać. Připrajach, a po tym mi Rico rjekny, zo by so wjeselił, móhł-li wostać. Mjeztym sym kruće přistajeny sobudźěłaćer a móžu rjec, zo sym so tež ja prawje rozsudźił.

Zwotkel su muki, zornjatka a dalše přidawki za chlěb, tykanc a małe pječwa?