Rězbarska dźěłarnička dźeń a mjezynarodniša – zajim publikuma dźeń a snadniši
Hižo 18. raz přeprosy towarstwo Kamjenjak spočatk požnjenca na finisažu mjezynarodneje rězbarskeje dźěłarnički při Miłočanskej skale. Wot swojeho załoženja w lěće 2009 angažuje so tute towarstwo, zo by ludźom zbliska a zdaloka w němsko-serbskej kónčinje wědu wo wuměłstwje a wobswěće posrědkowało. Kóždolětny wjeršk towarstwoweho dźěła je mjezynarodna rězbarska dźěłarnička, kotraž wotměwa so stajnje w poslednimaj tydźenjomaj žnjenca. Zo njeda so nic jenož dwě njedźeli dołho kopica wuměłcow porjadnje do dźěła, ale tež pilny team towarstwa, běše za wšěch, kotřiž skału časćišo wob lěto wopytuja, hižo při zajězdźe k skale spóznać. Tam stejachu mjenujcy eksponaty něhdyšich dźěłarničkow, zo by za lětsa nowonastate twórby direktnje při tak mjenowanym Krabatowym kamjenju dosć městna było. Wšako někotre wudźěłki tworjacych wuměłcow spěšnje noweho wobsedźerja namakaja, tamne pak wostanu a tworja tak trajnu wustajeńcu, kotraž hodźi so přez cyłe lěto darmotnje wopytować.
