Dowol na burskim statoku a dyrdomdej we wjesnej kónčinje zaručeć je cyłej swójbje wutrobna naležnosć

Mrózec statok bě něhdy (do lěta 1945) jedyn z najrjeńšich burskich statokow Róžanta. Tak wědźa so najstarši wobydlerjo na powědanje swojich prjedownikow dopomnić. Wokomiknje stawa so mjenowany statok w putniskej wsy zaso z powabliwym a zajimawym dworom, nic jenož w Róžeńće, ale tež daloko přez gmejnske a regionalne mjezy. Swójbje Kralec a Knopec z Pančic-Kukowa a Chrósćic stej před něšto lětami statok a k tomu słušace ležownosće (pola, lěsy a łuki) wot zhromadźenstwa namrěwcow po poslednjej wobsedźerce kupiłoj a z twarjenjom započałoj són zwoprawdźeć.