Mjez lětušimi dobyćerjemi Myta za angažement młodźiny su młodostni z Kulowa, kotřiž su sej wosebitu rumnosć stareje šule na Cyrkwinskim naměsće města zarjadowali.
Na konopeju sedźo čakaja młodostni na překwapjenku. Bernadett Zellerowa a Christoph Semper z Biskopičanskeje Syće za dźěći a młodźinu (KiJU) přinjesetaj jim šek, na kotrymž steji, zo dóstanu 400 eurow za swój angažement. Hnydom woni rozmysluja, na kotrej sćěnje móža dopokaz swojich idejow zaměstnić. Wulki šek na sćěnje budźe přichodnje bjezdwěla wosebity barbny akcent. Tež pokal ma wosebite městno na regalu dóstać.
