Skupiny za 35. sokołski volleyballowy turněr wulosowali
Jan Budar, direktor Załožby za serbski lud, je wčera popołdnju zhromadnje ze sobustawami předsydstwa Serbskeho Sokoła skupiny za 35. sokołski volleyballowy turněr wo pokal Domowiny wulosował. Do štyrjoch skupinow wulosowa Budar 19 přizjewjenych cyłkow a jedne mustwo, kotrež smě so hišće přizjewić. Na čole staflow steja najlěpše cyłki lońšeho turněra, mustwo z pólskeje Tokarnie lětsa sobu hrać njebudźe.
Hač do poprawneho přizjewjenskeho časa (31.12.16) je so 16 cyłkow přizjewiło, po tym hišće tři dalše. Tuž je so předsydstwo Serbskeho Sokoła na to dojednało, startowe polo na 20 mustwow rozšěrić. Za swobodne městno w skupinje D budu nětko zaměrnje mustwo pytać, zo by kóždy cyłk jenaku ličbu hrow měł. Na wupruwowanym modusu Sokoljo ničo změnić njebudu. Po skupinskich hrach chcedźa překřižne hry wuhrać, potom wo městna 5 do 20 hrać a naposledk finalne hry přewjesć. Wulke finale budźe znowa na wulkim polu wuhrate. Wo zastaranje budu so Sokołki a Sokoljo znowa sami starać. Hač budźe so dźěćaca zaběra poskićić móc hišće jasne njeje.
Njetrjebawšej poražce w Biskopicach
Dokelž bě krótko do hód hrajny dźeń w Biskopicach chorosće Biskopičanow dla wupadnył, dojědźechu sej volleyballisća z Marijineje hwězdy minjeny štwórtk do Biskopic k nachwatanskimaj hromaj. Nětko pak mějachu klóšterscy volleyballisća ćeže, hrajerjow hromadźe dóstać, dokelž tójšto chorosće abo dowola dla pobrachowachu.
ST Budyšin sewjer – ST Marijina hwězda 2:0 (21:20, 21:18)
Derje do přihotowanskich hrow startowali
ST Póst Germania Budyšin – SJ Chrósćicy 2:8 (1:4)
Za SJC zasadźeni: Králíček – Pöpel, Bětnar, Cyž, Sentivan, Teichmann, Młynk, Kunze, Runt, Schulze, Henčl, Žur, Věchet
Widźał,słyšał, napisał (31.01.17)
Minjeny kónc tydźenja steješe cyle w znamjenju zymskeho sporta, hdyž běchu wuměnjenja we Łužiskich horach tola hišće raz idealne za sankowanje, sněhakowanje abo hibanje na lodźe. Tež pola najlěpšich zymskich sportowcow napjatosć stupa, wšako přihotuja so wšitcy na sezonowe wjerški – swětowe mišterstwa w biatlonje, alpinym a nordiskim sněhakowanju w februaru a spočatk měrca. W skakanju je po wšěm zdaću Andreas Wellinger na najlěpšim puću, kaž wón njedźelu ze swojim dobyćom dopokaza. Tuž přemjenowachu žurnalisća městno skakanišća Willingen prosće na Wellingen.
Cyły Radworski dorost za bulom honił
Wot pjatka wječora hač do njedźele wječora bě ST 1922 Radwor halowe koparske turněry za wšitke dorostowe cyłki w starobnych klasach A do F přewjedło. Započatk tworješe młodźina A w Daimlerowej sportowej hali w Budyšinje, dokelž bě pjatk wječor w Slaviji ptačokwasny program. Hrajne zjednoćenstwo Radwor/Wulka Dubrawa nastupi z dwěmaj cyłkomaj. Škoda, zo njejsu wšitcy hrajerjo hosćićela přišli. Tak njeměješe zarjadowar w žanym z dweju cyłkow móžnosć wuměnjenja, štož je zawěsće lěpšemu wotrěznjenju zadźěwało. Koparjo z Radworja a Wulkeje Dubrawy wobsadźichu tuž dobre druhe a třeće městno. Jako najlěpšeho hrajerja wuzwolichu Lukasa Spindlera (HZ Radwor/Wulka Dubrawa).
Kónčna tabulka młodźiny A
1. Póst Germania Budyšin 5 8 8:4
2. HZ Radwor/Wulka Dubrawa I 5 7 11:4
3. HZ Radwor/Wulka Dubrawa II 5 6 6:5
4. HZ Ćisk/Łaz/Běły Chołmc 5 4 4:7
5. Rakečanske ST 5 2 3:10
Šansy prosće njewužili
SJ Chrósćicy – ST Wesenitztal 1:2 (0:2)
Za SJC zasadźeni: Králíček – Pöpel, Cyž, Sentivan, Teichmann, Zahrodnik, Hillmann, Šiman, Młynk, Kunze, Runt, Schulze, Šmit, Domaška
Třeći nowopřichad pola Budissy
Volleyballisća SGB najlěpši we wuchodnej Sakskej
Mjez 16 startowacymi šulemi z wuchodneje Sakskeje na wubědźowanju „Młodźina trenuje za olympiju“, a to w štyrjoch starobnych skupinach, zaruči sej Serbski gymnazij Budyšin (SGB) w sportowej družinje volleyball k třećemu razej wurjadne prěnje městno.
Kajki to zwjeselacy wukónc regionalneho wubědźowanja!? SGB wudoby sej po lětomaj 2014 a 2016 znowa čestne wopismo najlěpšeje šule wuchodneje Sakskeje w bulosportowej družinje volleyball. Z dwěmaj złotymaj, jednej slěbornej, jednej bronzowej medalju a jednym štwórtym městnom wobsadźi SGB cyle snadnje před Christiana Weisowym gymnazijom Žitawa prěnje městno. Wobě šuli matej ze 14 dypkami samsny kónčny rezultat, ale dźakowano jednomu druhemu městnu (Žitawa ma jenož třeće městno) počesćichu serbske kubłanišćo z přidatnym wopismom a dalšim hrajnym bulom jako myto. Wutrobnu gratulaciju wšitkim holcam a hólcam za wospjetny grandiozny wuspěch!
Sport (27.01.17)
Alpinske sněhakowanje
Gmejna Załom zarjaduje zajutřišim, 29. januara, mišterstwa alpinskeho sněhakowanja za sponsorow a firmy ze Załomja, Wjernarjec a Hołbina. To budźe wjeršk wubědźowanskeho kalendra tamnišeho sněhakowarskeho kluba. Dźakowano podpěrje nadregionalnych sponsorow a firmow móžachu Załomski sněhakowarski areal w zašłymaj lětomaj rekonstruować a powjetšić. Njedźelne mišterstwa započnu so w 11 hodź.
Młodźina A do F so wubědźuje
Sportowe towarstwo 1922 Radwor přewjedźe tónle kónc tydźenja hnydom wjacore halowe koparske turněry: dźensa wot 19 hodź. w sportowni Budyskeje Daimleroweje šule turněr młodźiny A, sobotu a njedźelu přez cyły dźeń w Radworskej hali turněry młodźinow F, E, D, C a B. Jutře wot 9 do 13 hodź. je to turněr młodźiny F, wot 14 do 18 hodź. młodźiny E a wot 19 do 23 hodź. młodźiny B. Zajutřišim, njedźelu, wot 9 do 13 hodź. nastupi starobna klasa D a wot 14 do 18 hodź. młodźina C.
Volleyballisća mocy měrja
Radworscy koparjo slěbro sej wubědźili
Hdyž druhe dźěći tučasnje sankuja, sněhakuja abo so po lodźe smykaja, honi koparski dorost za bulom – a to nutřka. Minjenu njedźelu přewjedźechu w Kamjencu kónčne hry wo halowe wokrjesne mišterstwa Zapadołužiskeho koparskeho zwjazka (WFV) w starobnej skupinje młodźina F. Za finale najmłódšich koparjow bě so šěsć z dohromady 42 přizjewjenych mustwow skwalifikowało: KT Ottendorf-Okrilla 05, Biskopičanske KT 08, Jednota Kamjenc, Wojerowski FC, ST Kinspork/Łužnica a ST 1922 Radwor jako jenički serbski cyłk. Kóždy hraješe přećiwo kóždemu, a to přeco dźesać mjeńšin. Turněr dobyli su koparjo z Kinsporka/Łužnicy. Radworčenjo wobsadźichu 2. městno a wjeselachu so nad pokalom a slěbrom.
kónčna tabulka
1. ST Kinspork/Łužnica 5 8:0 13
2. ST 1922 Radwor 5 8:4 10
3. KT Ottendorf-Okrilla 5 5:3 10
4. Biskopičanske KT 5 3:4 4
5. Jednota Kamjenc 5 1:5 4
6. Wojerowski FC 5 1:10 1
Antonija Wjeselic
