Hagen Domaška z Drježdźan: Rozsudźić maja wolerki a wolerjo:

Serbski sejm njeje žadyn wotzamknjeny pucher za derjeměće, žane towarstwo, kiž móže sej swojich čłonow wupytać. Wón je maksimalnje wotewrjeny politiski projekt, kotryž wotbłyšćuje wotewrjenosć serbskeho luda.

Mjez nami je wulka mnohotnosć. Mi je katolsko-serbska realita cuza, katolskim gmejnam je delnjoserbska realita cuza, serbskim wsam je serbska diaspora w Berlinje a Lipsku cuza. Najebać to znajemy so mjez sobu a wažimy sej jedyn druheho. Na lisćinje kandidatkow a kandidatow za druhi Serbski sejm steji wjele dobrych ludźi, kotřiž wšelake serbske reality reprezentuja. Idealny Serbski sejm jich wšitkich zjednoća.

Bohužel pobrachuja wólbne namjety Domowiny a jeje sobustawskich towarstwow, hačrunjež mějachu wot meje 2024 móžnosć, tute wozjewić. Bohužel stejitaj na lisćinje zasudźeny reichsbürger z Budyšina a Delnjoserb, kotryž z AfD we Wětošowskej měšćanskej radźe hromadźe dźěła. To mam za zlě. Ale tajkich Serbow je wjele: w Chrósćicach, w Choćebuzu a tež w Serbskim domje.