DB Fernverkehr AG naliči tójšto přičin, čehoždla njeje z jeje wida spomóžne, sydlenske kónčiny Danow, Frizow a Serbow bóle do swojich dalokowobchadnych zwiskow zapřijeć. Samsne płaći za rozšěrjenje aktiwitow, zo bychu so mjeńšinowe rěče w informacijach za pasažěrow abo w zjawnostnym dźěle wotnožki Němskeje železnicy wobšěrnišo jewili. To wuchadźa z wotmołwy na list předsydy mjeńšinoweje rady, Karla-Petera Schramma.

Budyšin (SN/at). „Jako za sebje hospodowace předewzaće dyrbimy swoje zwiski ... primarnje tam poskićeć, hdźež hodźa so drohe a jara spěšne ćahi z dobytkom předawanja tiketow refinancować“, wotmołwi dr. Patrick Braun, nawoda komunikacije poskitkow wotnožki Němskeje železnicy DB Fernverkehr. Regiony w Hornjej a Delnjej Łužicy su „zboka nadregionalnych hłownych wobchadnych zwiskow“.