Nowa čisćernja ma zerzawc z wody wufiltrować
Łužiska a srjedźoněmska towaršnosć hórnistwoweho zarjadnistwa (LMBV) dźěła z połnej paru na tym, wobstatk zerzawca ze Sprjejčanskeje hrjebje do Sprjewicy pomjeńšić. Wulku rólu hraje při tym bywša připrawa za čisćenje wody z wuhloweje jamy w Nowej Wsy.
Nowa Wjes (JoS/SN). Poprawom wšak chcychu připrawu ponowić, štož pak wysokich kóštow a časa dla cofnychu. 40 000 kubiknych metrow błóta měli so wotwozyć a předźěłać. Po nowych techniskich dopóznaćach je so LMBV w zhromadnym dźěle z předewzaćom LUG Engineering tzwr za twar modularneje wodočisćernje na stejnišću w Nowej Wsy rozsudźiła. Tajka ma wjele lěpšinow, wšako njeje hižo stacionarna. Nimo toho hodźi so přez najwšelakoriše module přetwarjeć. Nowowjesnjanska wodočisćernja leži wosrjedź lěsa. Přirodoškita dla su tam bywšu šaltowarnju spotorhali. Z toho nastata swobodna płonina 3 000 kwadratnych metrow je za natwar noweje připrawy dosahała, tak zo njebě žana dalša lěsna płonina trěbna.
Ratarstwo wuspěšnje dale wjesć
Róžeńčanska agrarna AG Sorabia z lońšej bilancu njespokojom
Ratarske předewzaća maja so wokomiknje jara ćežko. Wuspěšnje hospodarić njeje pod tuchwilnymi wuměnjenjemi lochko. Ratarjo nałožuja wjele prócy a trjebaja tójšto optimizma, zo by so dźěło na polach a w hródźach wudaniło. To je tež Róžeńčanska agrarna AG Sorabia minjene lěto nazhoniła. Předewzaće, wobstejace z třoch wobłukow – agrarneje towaršnosće, twarskeje tzwr a dejneho a rostlinskeho kombinata „Łužica“ –, njeje najebać efektiwne hospodarjenje w minjenym lěće tak wuspěšne było, kaž by to chcyło.
Na njedawnej hłownej zhromadźiznje, na kotruž bě Sorabia swojich akcionarow do Nowoslic přeprosyła, předstajištaj w rozprawomaj nawoda agrarneje AG Matej Korjeńk runje tak kaž předsyda dohladowarskeje rady dr. Thomas Kronenberg ćeže a njepřihódne dźěłowe wuměnjenja delanskich ratarjow.
Dobry signal zawoda do přichoda
Z twarskimi a planowanskimi wotpohladami metal předźěłaceho zawoda Ziegler na přemysłownišću pola Serbskich Pazlic je so Njebjelčanska gmejnska rada na swojim zašłym posedźenju zaběrała.
Do slědźenja inwestować
Strukturna změna we Łužicy je jenož móžna w mjezy, komuny a strony přesahowacym zhromadnym dźěle. To je facit wčerawšeho foruma we Wojerowskim wobydlerskim centrumje Piwarska 1.
Wojerecy (AK/SN). Na zarjadowanje „Što přińdźe po brunicy? Strukturna změna we Łužicy“ bě frakcija Lěwicy Budyskeho wokrjesneho sejmika přeprosyła, a něhdźe 25 ludźi je přišło. „Mamy tu přewjele politiskich nahladow, a nichtó nochce nahlad w zajimje regiona spušćić“, podšmórny organizator, měšćanski a wokrjesny radźićel Ralph Büchner z Wojerec.
Dźěłaja na zapisu a na protyce
Z połnej paru dźěłaja tuchwilu na nowym hosćićelskim zapisu za Hornju Łužicu. Zajimcy maja spěšnje jednać, chcedźa-li ze swojim přebywanskim poskitkom sobu zapisani być.
Budyšin (SN/BŠe). „Wo zapis do hosćićelskeho přehlada móže so kóždy prócować, kiž turistam přebytk poskića“, wujasnja nawoda Budyskeje turistiskeje informacije Jens-Michael Bierke, kiž nowy přehlad sobu zestaja. Z turistiskim přebytkom měnjene su pensije, dowolowe bydlenja, hotele a podobne. Region, kotryž so při tym wobkedźbuje, saha wot Budyšina přez Hornjołužiske hory hač k hornjołužiskej holi a hatam. Zaměr je, turistow wo najwšelakorišich móžnosćach přebytka informować a za nje wabić. Zajimcy pak měli so do spěcha měć. Jenož hišće hač do kónca měsaca maja wone chwile so přizjewić, zo móhli jich w nowym zapisu sobu wobkedźbować. Předwidźane je, zo ma tón w nowembrje wuńć. Wot januara 2017 chcedźa jón turistikarjo na wikach kaž w Stuttgarće, w nižozemskim Utrechće, Hamburgu, Berlinje abo Halle sobu poskićeć.
Měli wušo hromadźe dźěłać
Rakecy (AK/SN). Hospodarstwo a wědomosć měłoj wušo hromadźe dźěłać. Na to wusměrja so Łužiske wědomostne transferne myto. „Tu dźe wo woprawdźity idejowy transfer. Wobě stronje – hospodarstwo a wědomosć – měłoj přinošować a z toho profitować“, wuzběhny předsyda jury dr. Karl-Heinz Tebel minjeny pjatk w Rakecach. Tam je Łužiska hospodarska iniciatiwa myto za lěto 2017 mjeztym šesty raz wupisała.
Chcedźa kulturnu krajinu po jamje wobchować
Vattenfall so mnohostronsce prócuje bywše brunicowe jamy rekultiwować. Wo tym móžachu so zajimcy minjenu wutoru na ekskursiji do Wochožanskeje jamy přeswědčić.
Běła Woda (AK/SN). „Smy z dźěłom derje pokročowali“, podšmórny nawodnica fachoweho wobłuka rekultiwowanje a přirodoškit Franziska Uhlig-May na wuprawje. „Dotal trjebachmy za Wochožansku brunicowu jamu cyłkownje 5 600 hektarow přestrjenje. Z toho je 2 300 hektarow hižo zaso wužiwajomnych. 1 300 hektarow je lěsna płonina. 33 hektarow blisko Wochoz je samo ratarska płonina.“ Zbywaca přestrjeń ma přichodnje přirodoškitna wostać. Na kóncu wudobywanja wuhla we Wochožanskej jamje budźe tomu tak, zo je koncern Vattenfall cyłkownje 7 300 hektarow wotbagrował a zaso wužiwajomne sčinił.
„Chcemy staru syć pućow wobchować“, wujasni Franziska Uhlig-May. Při tym orientuje so Vattenfall na historiskich dokumentach. „Krajina bě kulturna krajina, z rekultiwowanjom spytamy znajmjeńša dźěle z toho wuchować, wožiwić a přichodnym generacijam za znowawužiwanje spřistupnić.“
Serbska firma nominowana
Budyšin (SN). Štó budźe lětsa z Hornjołužiskim mytom předewzaćela wuznamjenjeny, je jury wčera rozsudźiła. Šesćo předewzaćeljo z Budyskeho a třo ze Zhorjelskeho wokrjesa su nominowani, kaž Marketingowa towaršnosć Hornja Łužica-Delnja Šleska (MGO) zdźěli. Mjez nimi je tež firma Rječka-Čornak z Kamjeneje.
Mjez jurorami su zastupjerjo Industrijoweje a rjemjeslniskeje komory Drježdźany, tamnišeje rjemjeslniskeje komory, sakskeho hospodarskeho spěchowanja, Budyskeje agentury za dźěło kaž tež MGO. Kriterije za kandidatow Hornjołužiskeho myta předewzaćela su profil firmy, wu- a dalekubłanje dorosta a sobudźěłaćerjow kaž tež angažement w regionje. „Njebě runje lochko, z nominowanych třoch dobyćerjow wuzwolić, wšako bychu sej wšitcy wuznamjenjenje zasłužili. Smy hižo rozsudźili. Štó pak Hornjołužiske myto předewzaćela dóstanje, hišće njepřeradźimy“, praji čłon jury a jednaćel MGO Olaf Franke. Wuznamjenjenje budźe 20. oktobra we wobłuku Budyskeho dnja předewzaćela.
Swójbna tradicija traje hižo 100 lět
Składnostnje 100. róčnicy załoženja transportneje firmy přez Hórčana Jakuba Šustera, kotraž je mjeztym w štwórtej generaciji swój nadawkowy profil rozšěriła a změniła, móžeše minjenu sobotu mějićel firmy UBN Njeswačidło ze sydłom w Ralbicach Rafael Vcelich w swjedźenskim stanje wjace hač 150 hosći witać.
Ralbicy (aha/SN). Nimo něhdyšich a nětčišich sobudźěłaćerjow, přiwuznych a přećelow běchu na jubilejny swjedźeń tež firmownicy dróhotwarstwa, wotstronjenja zemskich a twarskich wotpadkow, keramikoweje industrije a twarstwa z připóznatymi a chwalobnymi wuprajenjemi přišli. Rafael Vcelich předstaji přihotowanu fotowu dokumentaciju a někotre originalne jězdźidła a dopomni na njelochke spočatki transportneje firmy, kotraž je swójbnu tradiciju hač do dźensnišeho zachowała.
