Budyšin (CK/SN). Dźěłowe wiki we wuchodnej Sakskej so dale derje wuwiwaja. To je na tym widźeć, zo je ličba bjezdźěłnych w juniju znowa woteběrała, bóle pak hišće na tym, zo ličba dźěławych z winowatostnym socialnym zawěsćenjom přiběra. Šef Budyskeje agentury za dźěło­ Thomas Berndt je na dźensnišej nowinarskej konferency najnowšu statistiku podał. Po njej je w Hornjej Łužicy 192 173 dźěłowych městnow, za kotrež dźěławi a dźěłodawarjo do socialneje kasy płaća. Najwjetši dźěl ludźi dźěła w předźěłacym přemysle kaž tež w strowotnistwje a socialnistwje. Z tychle branšow přizjewichu wot spočatka lěta tež najwjace swobodnych městnow. Kaž z ličbow dale wuchadźa, je we wuchodosakskich přede­wzaćach nětko 10 000 sobudźěłaćerjow wjace přistajenych hač před pjeć lětami. Aktualnje maja w dźěłowej agenturje 3 376 swobodnych městnow přizjewjenych.

Budyšin (CK/SN). W Hornjej Łužicy bě w juniju 23 245 žonow a muži bjez dźěła, štož je 751 mjenje hač měsac do toho. Mjez nimi bě 1 137 wukrajnikow. Tole zdźěli dźensa Budyska dźěłowa agentura. Kwota bjezdźěłnosće za region, za kotryž je agentura zamołwita, wučinja tuž 8,1 procent. Přiwšěm su we wuchodnej Sakskej dale wulke rozdźěle. Mjeztym zo je w Radebergu ze 4,4 procentami a w Kamjencu z 4,9 procentami kwota w regionje najniša, leži wona w Zhorjelcu pola 12,4 procentow.

W juniju je so na Budyskej dźěłowej agenturje 2 284 žonow a muži z bjezdźěłnosće wotzjewiło. 982 z nich namaka nowe přistajenje. Zwjeselace je, zo we wšěch starobnych skupinach bjezdźěłnosć woteběra a njeje wuskutk někajkich demografiskich přičin, rozjasni šef Budyskeje dźěłoweje agentury Thomas Berndt dźensa dopołdnja na nowinarskej rozmołwje. Po jeho słowach je so ličba bjezdźěłnych lětsa štwórty raz porno ličbam spočatk 90tych lět pomjeńšiła.

Piwowe družiny kaž Freiberger, Wernesgrüner a Radeberger su po wšěm kraju prezentne. W Hornjej Łužicy pak su tež małe piwarnje, kotrež su lědma znate, a přiwšěm tam wuspěšnje piwo warja. Tele piwarnje chcemy w lětnjej seriji přichodne tydźenje předstajić.

Lěta 2006 su w Budyskim hosćencu Sprjewina pensija pod Mostom měra jako wosebitu atrakciju piwo warić započeli. Tam bě kolebka dźensnišeje piwarnje Frenzel Bräu. Dokelž pak so tam rozšěrić njemóžachu a dokelž mějachu nimo toho hižo nazhonjenja z wulkej wodu, přetwarichu na Humboldtowej bywše twarjenje zawoda Robur a zaměstnichu piwarnju tam. Wot kónca zašłeho lěta wona dźěła. Tole powěda Tobias Frenzel, kiž jako šef hromadźe z přistajenym a ze swojim nanom piwarnju wjedźe.

Łaz/Grodk (SN). Wjac hač 40 šulerjow 9. lětnika Wyšeje šule Łaz wopyta njedawno pjeć zawodow we wokolinje Grodka. Zarjadowanje powołanskeje orientacije organizowało bě Grodkowske předewzaće za hospodarske spěchowanje (ASG). „Chcychmy zawodam zmóžnić, swoje powołanske předstawy na městnje rozjasnić, hdyž wučomnicy zajimcam wočakowanja na powołanje wosobinsce wuswětleja“, potwjerdźi Arwed Obst z ASG.

Wobdźělili su so mjez druhim Čornopumpske transportne předewzaće, blidarnja Łužica a zawod Knauf, kotryž zhotowja wudźěłki z gipsa. Tež powołanja fy­zioterapeuta, socialneho asistenta, kubłarja a mechatronikarja su wopytowarjam předstajili. Předewzaćeljo kaž šulerjo běchu ze zarjadowanjom jara spokojom, wšako móžachu tak wosobinski kontakt nawjazać. Přewodźacy wučerjo běchu překwapjeni wo wukubłanskim potencialu regiona. Tu móža šulerjo mjez wjele powołanjemi wuzwolić. Klětu chcedźa zamołwići znowa zarjadowanje přewjesć.