SZ Chrjebja-Nowa Wjes
– ST Marijina hwězda 0:1 (0:0)
Za hosći zasadźeni: D. Matik – Wróbl, Škoda, R. Hawš, Smoła, Peschmann, Pakoßnick, Bělk, Schmidt, O. Hawš, Jurš, Langer
Prěnju testowu hru za nowu sezonu wotmě prěnje koparske mustwo ST Marijineje hwězdy w Mikowje přećiwo wokrjesnemu ligistej SZ Chrjebja-Nowa Wjes. Dokelž bě a je přeco hišće tójšto hrajerjow w dowolu, měješe trenar Tobias Škoda jenož dwanaćoch k dispoziciji. Tak móžeštaj nowopřichadaj Stanij Smoła (SJ Njebjelčicy) a Oskar Hawš (Natwar Němske Pazlicy) hižo w startowej formaciji swoje zamóžnosće pokazać. Na woběmaj cyłkomaj bě widźeć, zo stejitej hišće na spočatku přihotowanskeje fazy. Hižo w 1. min. wotwobara Matik ze sylnej paradu zažny zastatk. W 25. a 26. min. pak dyrbješe wrotar Chrjebje-Noweje Wsy wšitke swoje zamóžnosće pokazać. Najprjedy wotwobara wón třělwu Bělka, krótko po tym třělwu Jurša.
