Kulturny sociologa Kristian Náglo chce wo serbskej kopańcy slědźić
Budyšin. (SN/BŠe). Mjeztym je wubranka Němskeje hižo dwójce wuspěšnje na tuchwilu so wotměwacych Europskich mišterstwach dobyła. Bórze zahaji so tohorunja Europeada, kotraž so wěsty čas samo paralelnje wotměwa. W Němskej a we Łužicy so swět potom zawěsće bjezwuwzaćnje kopańcy wěnuje.
Tuchwilu hotujetej so serbskej mustwje – žony a mužojo – na Europeadu w němsko-dansko-friziskim namjeznym regionje. Je to kónčina ze štyrjomi narodnymi mjeńšinami: Sintojo a Romojo, Frizojo, němska mjeńšina w Danskej a danska mjeńšina w Němskej. Zhromadnje z Federalistiskej uniju europskich narodnych skupin (FUEN) organizuja mjeńšiny wuznamne sportowe zarjadowanje.
