Tuta EM pisa dotalnje nimale jenož pozitiwne stawiznički. Skupinske hry a wosmifinale su wuhrate, wot jutřišeho pjatka dźe ze štwórćfinalnymi hrami do horceje fazy turněra. Nimo sportowych wjerškow wubranki DFB, předewšěm fanojo ze wšěch krajow města a ludźi zakuzłuja.

51 738 přihladowarjow přichwata přerěznje w skupinskej fazy k hram do stadijow. Wosebje w srjedźišću pak steja fanojo susodneho kraja. Němska je tróšku Oranje. Fanowe marše Nižozemjanow su absolutny spektakl. Na jich hrajnych dnjach přeměnichu naši susodźa dróhi do oranžojteje błudnicy. „Naar links, naar rechts“ – nižozemski spěw je hižo nětko EM-wuchač. Hinak hač při druhich zarjadowanjach nimaja za hry EM papjerjane tikety. Tikety steja jenož digitalnje přez app UEFA k dispoziciji.

Nimo zastupa do stadiona je wěstosć wšěch wobdźělnikow, za fanow, hrajerjow a sobudźěłaćerjow, to najwažniše. 335 000 policistow ma EM dla zakaz dowola. Woni wukonjeja wulkotne dźěło. Hač dotal njeběchu žane wjetše wukročenja, přihladowarjo čuja so wěsći.