Na šestym dnju wubědźowanjow Olympiskich hrow 2024 w Parisu njeje ani jenički sportowc medalju za Němsku zdobył. Zakitowar titula Alexander Zverev je překwapjace zwrěšćił. Němski tenisowy star podleža štwórtk w kole poslednich wosom Italčanej Lorenzej Musettijej 0:2. Tež pola žonow zwrěšći čisło jedyn swěta Iga Świątek. Pólka přěhra w połfinalu přećiwo Chinjance Zheng Qinwen.

Tohorunja měješe sej swětowa mišterka w judo, Anna-Maria Wagner, zuby zakusnyć. Němka je wčera wočakowanu medalju misnyła. Chorhojnica přěhra duel wo bronzu přećiwo Ma Zhenzhao z Chiny w podlěšenju.

Štwórtk zahajichu so nimo toho lochkoatletiske wubědźowanja. Prěnje złoto mjez lochkoatletami wudoby sej běhar Brian Daniel Pintado z Ekuadora. Němcy bohužel šansu na medalju njemějachu. Rutinjej Christopher Linke docpě w běhanju přez 20 km 19. městno, Leo Köpp doběža na poziciji 23 a Saskia Feige na poziciji 28 do cila.

Němske 3x3-basketballerki měrja so po wuspěšnym štwórtku na k.o.-koło. DBB-kwartet doby štwórtk rano přećiwo, hač dotal njeporaženym, Kanadźankam 19:15, a wječor přewiny zdobom cyłk z Azerbajdźana 12:8.