Worklečanscy wolejbulisća běchu swój přihot na nowu sezonu w sakskej klasy hižo spočatk awgusta zahajili. Do toho wabjachu horce temperatury časćišo na bičwolejbulnišćo hač do hale. Nětk pak běchu hrajerjo Viktorije dźakowni za přeprošenje na derje wobsadźeny halowy turněr w Choćebuzu, kotryž běše za tamniši CVV tohorunja test do starta hrajneje doby. Wot 12 mustwow, kotrež w hali při Poznańskej dróze nastupichu, słušeše 10 do Braniborskeje krajneje klasy a krajneje ligi. Mustwje 11 a 12 pochadźeštej ze Sakskeje. Běštej to lońši mišter a aktualny krajny ligist Módro-běli Wo­jerecy a naši Worklečenjo. Bohužel pobrachowachu na tutym dnju hrajerjam z Worklec někotři nazhonići hrajerjo. Tak steješe kapitan Ludwig Eckert zranjeneho porsta dla tónraz jenož jako trenar při nabóčnej liniji. Z pjeć hrajerjemi z druheho mustwa pak mějachu přiwšěm sylnu jednotku na hrajnišću, kaž so w běhu turněra skutkownje pokaza. Runje to je tež hłowna mysl serbskeho mustwa w tutej sezonje. Młodych hrajerjow chcedźa łahodnje prěnjemu mustwu zbližić a integrować.