VfL Pirna-Copitz –
ST Viktoria Worklecy 3:0
(25:9, 25:15, 25:16)
Hakle njedawno wjeselachu so Worklečanscy wolejbulisća nad druhim městnom na derje wobsadźenym „Let‘s drive-cupje“ w Choćebuzu a čujachu so poprawom derje přihotowani na nowu sezonu w sakskej klasy.
Tola hižo w zazběhowej hrě dyrbjachu njerjanu realitu akceptować. Do Pirny dojědźechu sej Worklečenjo z minimalnym kadrom šěsć hrajerjow plus libero. Hrajerjo z młodźiny, kiž w samsnym času furioznje do wobwodneje klasy startowachu, smědźa so hakle wot třećeho hrajneho dnja zasadźić. W Pirnje čakaše přiwšěm wicemišter předchadźaceho lěta, VfL Pirna-Copitz. Hosćićeljo njemějachu drje tež wšitkich nazhonitych hrajerjow k dispoziciji, wobsedźa pak wjele šěrši kader. Tohodla njeběchu wočakowanja hosći přewulke. Zo pak so hra tak hórko za Worklečanow wuwije, bě přiwšěm ćežko znjesć.
