Přepozdźe wotućili
Łužiske lodohokejowe liški –
Lodowe mjedwjedźe Regensburg 2:4 (0:1, 0:1, 2:2)
Wot třećeje mjeńšiny bu hra napjata. W běhu jedneje mjeńšiny rozdźěli sudnik dwě chłostani přećiwo hosćom a tuž agěrowachu domjacy krótkodobnje z dwěmaj hrajerjomaj wjac na lodźe. Regensburg pak jara klewernje zakitowaše a žane wrota njedopušći. Na to dóstachu hosćo hišće wjace móžnosćow, zwrěšćichu pak na wrotarju Liškow, štož běše tónraz zaso Nikita Quapp. Hru z hrajerjom mjenje na lodźe we 18. min. přetrachu Łužičenjo hišće zbožowni, ale pjeć sekundow pozdźišo docpě potom Abbott Girdukis prěnje wrota. Šěsć sekundow do kónca třećiny by Michael Bartuli přez penalty wurunać móhł, zwrěšći pak na Thomasu Mc. Collumej we wrotach hosći.
W srjedźnym wotrězku tłóčachu Liški na wurunanje. Najwjetšu móžnosć měješe při tym Roope Mäkitalo, jako dósta puk swobodnje přihraty, ale na wrotarju zwrěšći. Ke kóncej druheje třećiny běchu Łužiske liški zaso w podličbje a hosćo na 2:0 zwyšichu (38.). Třělc wrotow bě Jakob Weber.
Interny koparski turněr Sokołow
Kóžde lěto mjez hodami a nowym lětom zetkawaja so koparjo Sokoła Ralbicy/Hórki w swójskej ćěłozwučowarni, zo bychu interny koparski turněr přewjedli. Tónraz zetkachu so wječor po druhim hodownym swjatym dnju.
Nowolětne běhi we Wojerecach
Koparski dorost w Ralbicach za bulom honił
Čłonojo Sokoła Ralbicy/Hórki organizowachu mjez hodami a nowy lětom zaso tři koparske turněry juniorow. Sportowa hala w Delanach běše tuž wot ranja hač do wječora derje pjelnjena, wšako honješe tam wjac hač 150 dźěći nimale 10 hodźinow dołho za bulom. Přeprošene běchu zaso cyłki z wokolnych gmejnow.
Turněr młodźiny F
Europeada: Koparki trenowali
Serbske mustwo žonow bě přez kónc tydźenja we Werdauwje treningowe lěhwo jako přihot za lětušu europeadu přewjedło. Dohromady 19 holcow a žonow so na přihotowanskim kóncu tydźenja wobdźěli.
Pjatk wječor mějachu prěnju treningowu jednotku z wšelakorymi techniskimi zwučowanjemi za hrajerki a specielnymi zwučowanjemi za wrotarki. Zakónčaca hra skulojći zazběh sepje jednotliwych treningowych wobsahow. Po wječeri slědowaše oficialne wotewrjenje treningoweho kónca tydźenja přez trenarja Pětra Bejmaka. Nimo toho wuhódnoći so wurězk nahrawaneje widejoweje sekwency zakónčaceje hry.
Dźewjata zymska edicija Kulowcupa
Dypkownje startowaše sobotu, 6. januara, we wjacezaměrowej hali w Kulowje tak mjenowany koparski turněr Kulowcup. Zarjadowarjej a organizatoraj běštej cyłk Kulowminatijow a United Clubs for Kulow. Wobdźěliło bě so dźesać mustwow młodźinskich klubow z a wokoło Kulowa: Kulowminatije, Zelena garda, WD-40, Kickery, Koćina-Kulow, Němcy, Kulow Section, Flames of Pils, Dołha garda a Bojazliwcy.
Startuja połnje nadźije do noweho lěta
Mustwo FC Energije Choćebuz je po zymskej přestawce minjenu srjedu trening zahajiło. Na zakładźe mnohich schorjenjow w mustwje w tydźenjach do hód dyrbještej so poslednjej hrě w lěće 2023 wotprajić. Nětko sćěhuje na spočatku dypkoweho hrajneho koła za FCE chětro wjele winowatostnych partijow. Wot 21. januara (domjaca hra přećiwo Herće II) hač do kónca februara ma FCE inkluziwnje nachwatanskeje partije w krajnym pokalu (14. februara pola VfB Kśišow) dźewjeć hrow absolwować, štož woznamjenja za tuchwilu wuski kader wulke wužadanje. Tola trenar Claus Dieter Wollitz nochce skiwlić, hdyž praji: „Wězo je personelna situacija tež dla čerwjeneju kartow za Timmyja Thiele a Joshua Putze kaž tež dołhodobneho zranjenja kapitana Axela Borgmanna komplikowana. Ale mamy kader, kotryž to bjezdwěla znjese, hdyž hrajerjo raz na swojich starodawnych pozicijach njehraja.“
Wupadow hrow dla je so FC Energija w tabulce na městno štyri sunyła. Łužičenjo su nětko we winowatosći, nachwatanske hry dobyć, zo bychu so zaso přibližili.
Hrać, so zeznać a so dopokazać
Aktiwne přihoty za lětuše europske koparske mišterstwo awtochtonych narodnych mjeńšin w sewjernej a južnej Schleswigskej běža. Kaž naposledk před kóždym turněrom přewjedźechu mužojo Serbskeho mustwa wot 5. do 7. januara w Choćebuzu treningowe lěhwo k mjezsobnemu zeznaću.
Nimale wšitcy ze 27 přeprošenych hrajerjow přijědźechu pjatk na pózdnim popołdnju. Hnydom po přichadźe započinaše so w hali trening. W srjedźišću stejachu hry a zeznaće teama. Po hodźinje přewza mustwowy fyzioterapeut Měrćin Špitank a rozłoži, kak wažne je, ćěło na tajki turněr přihotować. Wón skedźbni na hoberske poćežowanje mnohich hrow w najkrótšim času. Sobotu dźěše po snědani na kumštny trawnik. Nimo hrajnych formow běchu wosebje štyrjo přitomni wrotarjo žadani.
Widźał, słyšał, napisał (08.01.24)
Awtor dźensa
Tadej Cyž
Nowe lěto je so započinało a swět sporta so hižo razantnje wjerći. Nimo toho zo so přichodny kónc tydźenja w zwjazkowej lize zaso za bulom honi, je wjeršk w januarje zawěsće europske mišterstwo w mjetańcy. Tu maja němscy mužojo domjacu lěpšinu a startuja přećiwo Šwicarskej do turněra. Kuriozum při tym je, zo přewjedźe so hra w Düsseldorfskim koparskim stadionje. Dalše hrajne města budu Mannheim, Mnichow, Berlin a Köln. Jara młode mustwo narodneho trenarja Gislasona njeliči tónraz k wulkim faworitam. Ale snano je runje to přijomnišo za němski cyłk. Tak njeje ćišć přewulki.
Dalše wulke sportowe zarjadowanje budźe swětowe mišterstwo wot 7. do 18. februara w biatlonje. Tute wotměje so pola našich susodow w Čěskej. Cyłkownje 12 rozsudow padnu w Nowym Měsće na Morawje. Tež němske biatlonowe mustwo ma šansy na medalje.
Sport (05.01.24)
Nowolětne běhi we Wojerecach
Wotrjad lochkoatletika sportoweho kluba Wojerecy budźe njedźelu, 7. januara, w sportowym forumje we Wojerecach nowolětne běhi přewjesć. W poskitku změja tam distancy 6 km a 2,2 km. Start wobeju běhow je w 10.30 hodź., přizjewjenja na městnje su jenož hišće hač do 10.15 hodź. móžne.
Halowy turněr TCM
Koparski turněr Towarstwa Cyrila a Metoda z.t. (TCM) budźe jutře wot 15.30 hodź. w Chróšćanskej „Jednoće“. Hraja wo pokal TCM. Přeprošene su wosadne a wjesne mustwa młodźiny kaž tež cyłki sportowych jednotkow. Přizjewjenja su pola Guida Zahrodnika w Jaseńcy pod telefonowymaj čisłomaj (03 59 33) 3 11 53 abo 0151 52 22 17 59 hišće móžne.
Přihotowanske koparske hry
06.01. 13:00 FC Energija Choćebuz –
ST Choćebuz-Strobice
13.01. 13:00 FC Eilenburg –
Budissa Budyšin
13.01. 13:00 Wojerowski FC –
Módro-běli Kulow
Kulow cup w Kulowje
