Katolscy křesćenjo swjeća wulki swjaty dźeń Božeho ćěła
Ralbicy (SN/MWj). Nimo jutrow, hód a swjatkow je swjaty dźeń Božeho ćěła sobu najwažniši cyrkwinski podawk katolskich křesćanow. Na wosebite wašnje tež w serbskich wosadach wuznawaja, zo wěrja do přitomnosće Jězusa Chrystusa we woblatku. A činja to zjawnje a na swjatočne wašnje w procesionach. Po dopołdnišich kemšach podachu so dźensa wěriwi přewažnje w ćmowej drasće a kěrluše spěwajo k wonkownym wołtarkam. W Ralbicach na přikład maja tajki na nawsy blisko Statnikec. Kěrluše po puću kaž tež při wołtarku přewodźachu zwjetša wosadni dujerjo.
