Přewšo zajimawy cil njedźelu na dnju wotewrjeneho pomnika
Radwor (SN/MWj). Časy, zo sy z Radworskeho dwórnišća z ćahom do Budyšina abo do Wojerec jěć móhł, drje su dawno nimo a so z wěstosću tež njenawróća. Ale na to dopominać móžeš so njedźelu na dnju wotewrjeneho pomnika. Potom móžeš sej tam čakansku halu runje tak wobhladać kaž bywšu Mitropu a rumnosć, z kotrejež běchu něhdy přez wokno małe papjercowe jězdźenki předawali. Posledni ćah z Radworja je 1998 wotjěł, a před dźesać lětami su tež kolije wotstronili. Ale na wobrazach z dawnych časow a z nowymi idejemi Radworske dwórnišćo takrjec z rowa stawa. Zo je to scyła móžno, je skutk Jěwy-Marje Chěžcyneje a jeje mandźelskeho Tina z Boranec. Wonaj staj so móhłrjec do dwórnišća zalubowałoj a jón lěta 2011 kupiłoj. „Běch wo tymle twarjenju přemóžena a widźach, zo chowa wone wulki potencial we sebi“, powěda rodźena Chelnjanka. Po tym zo daštaj wonaj jako prěnje bywšu wačokownju ponowić, započeštaj 2014 wobstejace bydlenja wutwarjeć. Wšitke štyri su dźensa wobydlene.
