Běła Woda (AK/SN). Zhorjelska policajska direkcija chce z rjemjeslnikami a přemysłownikami sylnišo hromadźe dźěłać a wotsamo w firmach naprawy přećiwo kriminaliće namjetować. „Wěstotu móžemy jeno zaručić, hdyž so kóždy jednotliwc sobu wo to stara“, praji policajska hłowna komisarka Monika Kütter, referentka za wobydlerske prašenja w Zhorjelskej policajskej direkciji, tele dny na stajnym blidźe k wěstoće w Běłej Wodźe. Drježdźanska rjemjeslniska komora, policajska direkcija a Zhorjelski wokrjes běchu přeprosyli. Nimale 50 zastupjerjow rjemjeslniskich zawodow, policije, wo­krjesa a města bě přišło.

„Kriminalita w hraničnej kónčinje k Čěskej a Pólskej je dale wulka“, rozłoži Monika Kütter k naprašowanju w 3 500 zawodach Zhorjelskeho wokrjesa loni w aprylu. Wjace hač pjećina zawodow bu loni a nimale dwě třećinje wot lěta 2012 wot paduchow domapytanych. 65 procentow z nich bě samo wjace hač jónu wopor kriminality. Kritisce pak Monika Kütter přispomni, zo 42 procentow wopra­šanych zadobywanje scyła nic abo nic w kóždym padźe přizjewiło njeje.