Zawrjene kónčiny haća monitoring na sewjeru Budyskeho wokrjesa
Budyšin (UM/SN). We wokrjesu Budyšin bě loni 19 lěsnych wohenjow, kotrež wupřestrěwachu so po nimale hektarskej płoninje. Tole wuchadźa z rozprawy wo škiće lěsa 2016, wozjewjeneje wot krajnoradneho zarjada. Najwjetši woheń z 0,64 hektarami wobškodźeneje přestrjenje bě 23. meje blisko Brětnje. Kaž z wokrjesneho lěstnistwoweho zarjada rěka, je so w tymle wobłuku minjene lěta časćišo paliło, při čimž tukaja na zapalerstwo. Tež krupy su lěsam we wokrjesu škodźeli. Tohorunja 23. meje – po zdaću bě to turbulentny dźeń – padachu krupy, wulke kaž tenisowe buliki, nad Kaponicu (gmejnje Radwor a Rakecy), nad Brěžkami a Mučowom. Krupy zawinichu hoberske škody na skorje štomow, čehoždla mnohe z nich wotemrěchu. Wulka mokrota w lěću je tomu polěkowała, zo so hrib sphaeropsis sapinea sylnje rozšěri, štož je k wotemrěću prućow předewšěm pola chójnow wjedło.
