Stróža (SN/BŠe). Najebać měnjate wjedro minjenu sobotu běchu syły ludźi na 16. nalětnje wiki přirody do Stróže přijěli. Mjez wjac hač 80 wikowarjemi su wosebje zahrodnistwa z najwšelakorišimi družinami zeleniny, kwětkami, zelemi, ale tež sadowcami zajimcow wabili. Nalěto dźě zahrodkarjo zaso pilnje sadźeja. Bohaty wuběr tež staršich družin zeleniny, na přikład tomatow, abo nowych družin, kaž běłu ananasowu truskalcu, mějachu wikowarjo w poskitku.
Přirodowe wiki su, kaž mjeno přehladki přeradźa, mnohim wikowarjam wu- trobna naležnosć. Tak poskićeštaj na přikład mandźelskaj Jochen a Carina Heine z Klukša dźěćacu drastu ze zelenej wutrobu, štož rěka, zo šijetaj drastu z certifikowaneho biopłata. ,,Namaj je wobstajnosć jara wažna. Drasta tuž z dźěćimi sobu rosće, zo móhli je wjacore lěta wužiwać“, Jochen Heine wuswětli. Pisane šaty, cholowy a čapki běchu mjez wopytowarjemi jara woblubowane.
