Něhdźe 220 młodostnych sobotu w Kamjentnym domje swjećiło

Budyšin (SN/mwe). Reje wosebiteho razu wotměchu so minjenu sobotu w Budyskim Kamjentnym domje. Nimo DJjow hrajachu tam prěni króć hercy serbskeje młodźinskeje projektneje band, hišće bjez mjena. Sydom hudźbnikow piskaše přewažnje znate serbske rejwanske štučki. „To bě wulkotny wječork, kotryž smy w kooperaciji z organizatorom najwšelakorišich zabawnych zarjadowanjow Tillom Blaniju z Budyšina přewjedli“, hódnoćeše Pětr Dźisławk zarjadowanje. Šuler 11. lětnika Serbskeho gymnazija Budyšin je předsyda noweho młodźinskeho towarstwa Serbska murja. Dźesać čłonow cyłka chce so za serbsko-němske přećelstwo a hajenje swjećenskeje kultury zasadźeć, kaž woni sobotu měnjachu. Tak su tam nimo Budyskich tež serbscy młodostni z Chrósćic, Ralbic a Radworja hač do ranja swjećili. Prjedy hač pak kapała do reje prošeše, je čłon Serbskeje murje, Chróšćan Michał Donat, towarstwo skrótka předstajił.