Kulowc (aha/SN). Mnozy su njedźelu rjane wjedro wužili a sej z kolesom wulećeli. Popołdnju sy tež na wšěch delanskich wjeskach a dale hač do Wojerec widźał młodych a staršich muži w dźěłanskej drasće meju stajeć. Wot kotreho časa w Kulowcu meju stajeja, nihdźe zapisane njeje. Starši ludźo wšak so dopominaja, zo je tomu hižo wot časa po Druhej swětowej wójnje kóždolětnje tak. Předsyda Kulowčanskeho wjesneho kluba Gero Paška bě njedźelu spokojom. Wjace hač 30 muži je přišło, zo bychu 23 metrow wysoku, z dweju zdónkow zestajenu meju stajili.

Předsyda 25 čłonow wopřijaceho młodźinskeho kluba Julius Kral powědaše, zo je młodźina minjeny štwórtk hałžki wobstarała a wjesne žony naplećechu girlandu a wěnc. Na wjeršku přičiništaj Tomaš Arnold a Dieter Domaška serbsku chorhoj. „To kóždemu nimojěducemu hižo znazdala pokazuje, zo smy Serbja, k čemuž so rady zjawnje wuznawamy“, wonaj měnještaj. Hižo třeće lěto maja tež wjesne dźěći swoju meju. Gero Paška jim pomhaše, štyri metry wulku, z wěncom pyšenu brězu stajić.