Njeswačidło (LR/SN). Druhi raz běchu minjeny kónc tydźenja wrota Njeswačanskeho parka za wuměłske rjemjeslniske wiki pod hesłom „Wiki rjanych wěcow“ šěroko wotewrjene. Wjace hač 60 rjemjeslnikow-wuměłcow ze wšelakich regionow Němskeje je tam najwšelakorišu pychu za dom, bydlenje a zahrodu po­skićało.

Za debjenki z drjewa, metala, škleńcy abo slěbra zajimowachu so bóle žony. Wuměłskeho kowarja ze Schönbrunna pola Biskopic wobdźiwachu hłownje mužojo a dožiwichu, kak wón swoje železo nad ­wohenjom k figurinje formuje a wobdźěłuje. Tež stejnišćo štrusoweho farmarja bě přeco derje wopytane. Dźěćom ­lubještaj so wězo klawnaj Lotti a Ugo­ ze swojimi hłuposćemi a z wulkim kołom zboža, kotrež móžachu wjerćeć a sej ­při nim maličkosć dobyć. Rady pak sej tež mali wopytowarjo při stejnišću mydłoweje žony swoje mydło zhoto­wichu.