Peking (JBo/SN). Spěšnosankowar Johannes Ludwig, pochadźacy z durinskeho Suhla, je sej wčera prěnju złotu medalju za Němsku pola Olympiskich zymskich hrow w Pekingu zdobył. Z kónčnym časom 3:48:735 min. bě Ludwig cyłkownje 0,16 sekundow spěšniši hač Awstričan Wolfgang Kindl a 0,951 sekundow hač Italčan Dominik Fischnaller. Dalši němski wubědźowar Felix Loch bu štwórty. W sněhakowarskim skakanju muži wudoby sebi Japančan Ryoyju Kobayashi ze skokami 104,5 a 99,5 metrami złoto. Najlěpši Němc běše Constantin Schmid na jědnatym městnje. Na distancy 5 000 metrow nastaji spěšnosněhakowar Nils van der Poel wčera nowy olympiski rekord. Šweda bě po 6:08:840 min. cilowu liniju překročił. Rusa Alexander Bolšunow wudoby sebi prěnje městno w skiatlonje na čarje 30 km, z časom 1:16:09,8 hodź. W disciplinje ski-freestyla běše 23lětna Awstralčanka Jakara Anthony najlěpša.